Spueniekämpfer

Vu Wikipedia
Wiesselen op: Navigatioun, sichen
D'Monument No pasarán! beim CDMH zu Diddeleng, e Wierk vum Lucien Wercollier dat 1997 ageweit gouf

Mat Spueniekämpfer gi gemenkerhand déi Leit bezeechent, déi fräiwëlleg als Brigadisten op der Säit vun de Republikaner an de Spuenesche Biergerkrich gezu sinn, fir géint déi franquistesch Truppen ze kämpfen. Vu Lëtzebuerg aus waren dat der ëm déi 100.[1]

Déi meescht vun hinne waren Aarbechter aus dem Minett, déi a lénkse politesche Parteien aktiv waren. Vill haten e Migratiounshannergrond.

Vun de Fräiwëllege vu Lëtzebuerg sinn der 18 a Spuenien gestuerwen. Vun 8 aneren ass net gewosst op se zréck komm sinn oder a Spuenien ëmkomm sinn. Ëm déi 30 vun deenen déi zréckkoumen, goufe schwéier verwonnt.[2]

Joerzéngtelaang ass hinnen de Status vum Resistenzler net unerkannt ginn. Mat Ursaach dovu war e Mësstrauen, fir net ze soen Anti-Kommunismus vun deene Kreesser, déi och z. B. hanner dem Maulkuerfgesetz stoungen, an deen am Kale Krich en neien Opdriff krut, awer och méi banal eng gewësse politesch Lethargie an den Ëmstand, datt et zu Lëtzebuerg kee Status fir Ancien combattants gëtt.

Eréischt Enn vun den 1990er Joren huet dat sech geännert. Den Henri Wehenkel huet e gutt dokumentéiert Buch iwwer d'Spueniekämpfer publizéiert.

Zu Diddeleng bei der Gare Diddeleng-Schmelz gouf 1997 d'Monument No pasarán!, e Wierk vum Lucien Wercollier, ageweit (dat 2001 profanéiert gouf) an 1998 koum et zu der Grënnung vun enger A.s.b.l., Les amis des brigades internationales. Uganks 2000 koum et zu enger Debatt an der Chamber, an datselwecht Joer kruten déi wéineg, déi bis dohin nach gelieft hunn, e Gielche vum Premier Juncker iwwerreecht.

De 16. Juli 2003 huet d'Chamber eestëmmeg, d'Gesetz vum 10. Abrëll 1937 abrogéiert, dat den Awunner vu Lëtzebuerg verbueden huet, um Spuenesche Biergerkrich deelzehuelen. Duerch dësen éischter symboleschen Akt gouf de Brigadiste vun do hiren antifaschisteschen Engagement nodréiglech legitiméiert an unerkannt.

Literatur[änneren | Quelltext änneren]

  • Henri Wehenkel: D'Spueniekämpfer - volontaires de la Guerre d'Espagne partis du Luxembourg. Centre de documentation des migrations humaines, Dudelange,1997.
  • Hommage aux Volontaires des Brigades Internationales, 52 S. Imprimerie print-service, Lëtzebuerg. (Broschür déi 1997 bei der Aweiung vum Monument bei der Gare Diddeleng-Schmelz erauskoum).

Documentaire[änneren | Quelltext änneren]

  • Frédéric Fichefet an Edie Laconi: Les perdants n'écrivent pas l'histoire - Mémoires luxembourgeoises de la Guerre d'Espagne. 2001.

Um Spaweck[änneren | Quelltext änneren]

Commons: International Brigaden – Biller, Videoen oder Audiodateien

Referenzen an Notten[Quelltext änneren]

  1. An der Literatur fënnt een ënnerschiddlech Zuelen. Am H. Wehenkel (1997) sengem Buch sinn et der 102 (S. 14) oder 88 (S. 78, sou och an der Lëscht mat den Nimm vun de Fräiwëllegen op der S. 119). An der Lëscht vun der Broschür vun 1997 (Hommage aux volontaires, asw.) stinn d'Nimm vun 90 Fräiwëllege vu Lëtzebuerg aus.
  2. H. Wehenkel 1997, S. 78.