Tornado vu Péiteng

Den Tornado vu Péiteng war e Wierbelstuerm, deen den Owend vum 9. August 2019 iwwert dat franséisch-lëtzebuergescht Grenzgebitt gezunn ass.

No Aschätzunge vum Schuedbild huet den Tornado Wandspëtzte vun 241 km/h erreecht, wat enger Stäerkt vun F2 op der Fujita-Skala oder T5 op der TORRO-Skala entsprécht.

Well de Wierbelstuerm iwwer dicht besidelt Gebidder gezunn ass, gouf et grouss Materialschied op béide Säite vun der Grenz an op der lëtzebuergescher Säit deels schwéier Blesséierter.

Verlaf

Den Tornado huet tëscht 10 a 15 Minutte gedauert an huet dobäi eng Streck vun ca. 18 bis 20 km zeréckgeluecht. D'Schneis hat eng Breet vun duerchschnëttlech 350 m, mä huet plazeweis souguer eng Breet vu 750 m erreecht.

Nodeems de Wolléckerüssel bei der franséischer Uertschaft Lexy fir d'éischt de Buedem erreecht huet, ass en a Richtung Nordoste weidergezunn an ass bei Rodange op lëtzebuergescht Gebitt komm. Vu Péiteng un huet en du seng stäerkst Intensitéit entwéckelt, an et huet sech e Multivortex entwéckelt, e Wierbelstuerm, deen aus méi Eenzelwierbele besteet, déi rondrëm ee gemeinsamen Zentrum kreesen. Dëst huet och derzou gefouert datt d'Schneis op bis zu 750 m breet gouf.

Hanner Nidderkäerjeng hu sech d'Wierbele schlussendlech opgeléist.

Betraffen Uertschaften

Land	Gemeng	Uertschaft
Frankräich	Lexy	Lexy
Frankräich	Longwy	Longwy
Frankräich	Herserange	Herserange
Frankräich	Longlaville	Longlaville
Frankräich	Saulnes	Saulnes
Lëtzebuerg	Péiteng	Rodange
Lëtzebuerg	Péiteng	Rolleng
Lëtzebuerg	Péiteng	Péiteng
Lëtzebuerg	Käerjeng	Nidderkäerjeng

Chronologie

MeteoLux huet eng Warnung vum Niveau Giel ("Danger potentiel") erausginn. Et goufen Donnerwiederen tëscht 17 an 21 Auer owes gemellt, mat staarkem Wand, vill Reen a Knëppelsteng.

13:30

MeteoLux setzt d'Wiederwarnung vum Niveau Giel op Orange ("Danger") erop.

16:05:27

Éischt Blëtzaktivitéit gëtt südlech vu Sugny an de franséischen Ardenne registréiert. D'Donnerwieder ass ongeféier um hallwe Wee tëscht Reims a Verdun a beweegt sech a Richtung Nordosten..

17:35

Déi éischt Rotatioun gouf an der Donnerwiederzell registréiert. D'Donnerwieder huet sech mëttlerweil zur Superzell entwéckelt an ass kuerz virun der Lëtzebuerger Grenz.

ca. 17:40

Den Tornado entsteet an de Wierbel beréiert de Buedem.

ca. 17:50

Den Tornado léist sech op.

19:30

MeteoLux hieft d'Warnstuf Orange op.

21:00

De Staatsminister Xavier Bettel rifft eng Krisenzell an. Déi besteet ënner anerem aus dem Inneministère, dem CGDIS, der Police, der Arméi, der CREOS an dem staatleche Wiederdéngscht MeteoLux.

Se kënnt ënner der Presidence vum Minister Dan Kersch, als Vertrieder vun der Inneministesch Taina Bofferding zesummen.

Bilan

19 Persoune goufe beim Tornado blesséiert, dovun zwou schwéier.

De Materialschued beleeft sech Schätzungen no op ronn 100 Milliounen Euro.

Am Ganze goufe Schied un 314 Gebaier op lëtzebuergescher Säit verbucht. Et goufe gréisstendeels Daachzille lassgerappt oder d'Diech komplett ofgedeckt. Des Weideren huet sech wéinst den enorme Wandvitessen eng Projektilwollek gebilt, wouduerch Trümmer a Fassade stieche bliwwe sinn.

Sou goufen zu Péiteng ronn 30 Haiser komplett ofgedeckt, a bei weidere 50 goufen d'Diech schwéier beschiedegt. Zu Nidderkäerjeng goufen iwwer 100 Haiser beschiedegt, dovunr eng 30 mat Schied um Daach.

Beem goufen entwuerzelt, a Stroummasten ëmgeknéckt.

Autoen a Camionettë goufen ëmgehäit an deplacéiert oder duerch Géigestänn, déi fortgeblosen oder ofgerappt goufen, beschiedegt. Den Zuchverkéier tëscht Péiteng an der Stad huet missen ënnerbrach ginn.

Iwwer 200 Pompjeeën a Leit vun de Rettungsdéngschter, a ronn 40 Polizisten waren direkt dono am Asaz. Den 112 krut eng Dausend Uriff dowéinst.

Kuckt och

• Naturkatastrophen zu Lëtzebuerg

Um Spaweck

Videoen

• "Anfang des Tornados in Luxemburg 😢😢😢" Video vum Wierbel dee ganz no bäi laanschtzitt, gutt ze gesinn de Wollekerüssel, gefilmt zu Rodange; youtube.com
• "Tornado wütet in Luxemburg (09.08.2019)" Videoe vum Tornado an de Schied; youtube.com
• "Tornado über Luxemburg" Videoe vum Wollekerüssel; youtube.com
• "Les habitants de Pétange après le passage de la tornade" Video vun de Schied zu Péiteng; youtube.com

Fotoen

• "Tornadoliste Luxemburg" Fotogallerie vun de Schied

National Press

• "Tornado suergt fir vill Schued am Süde vum Land." Reportage am Journal vun RTL Tele Lëtzebuerg; rtl.lu, 09.08.2019, mat den éischten Impressiounen.
• "Dossier: Tornado im Süden Luxemburgs." Artikelen zum Theema op wort.lu (gekuckt 2021-05-28).

International Press

• "Tornadoes tear through Amsterdam and Luxembourg" The Washington Post, USA
• "Twin tornadoes whip through northern Europe, hospitalizing at least 14 people" CNN, USA
• "Tornado injures 19 in Luxembourg as storms batter Europe" The Telegraph, Vereenegt Kinnekräich
• "14 skadd i tornado i Luxembourg" Dagbladet, Norwegen
• "Tornado zog „Schneise der Verwüstung“" ORF, Éisträich
• "Tornado wütet in Luxemburg – Großherzog besucht Unglücksorte" Berliner Morgenpost, Däitschland
• "Tornado wütet über Luxemburg" Der Tagesspiegel, Däitschland
• "Tornado hinterlässt schwere Schäden" Deutsche Welle, Däitschland