Musculus triceps brachii

Dësen Artikel beschäftegt sech mat dem Muskel am Ueweraarm. Fir fir de Muskel am Been, kuckt wgl. Musculus triceps surae.

Musculus triceps brachii ass déi laténgesch Bezeechnung fir e Muskel am Aarm vum Mënsch, respektiv an der ieweschter oder viischter Extremitéit vu villen anere Wierbeldéieren. Beim Mënsch gëtt en am alldeegleche Sproochgebrauch just Trizeps genannt. Et gëtt awer nach e weidere Muskel mat engem änlechen Numm an der Wued – de Musculus triceps surae.

Den Trizeps ass de Muskel, deen haaptsächlech fir d'Strecke vum Ielebougelenk (also d'Strecke vum Aarm) verantwortlech ass.^[1] De Bizeps dogéint ass fir d'Béie vum Ielebou zoustänneg.

Beschreiwung

Beim Mënsch läit den Trizeps op der Récksäit vum Ueweraarm. En huet dräi Muskelkäpp: de mëttleren (Caput mediale), de säitlechen (Caput laterale) an de laange Kapp (Caput longum). An der Richtung vun der Schëller entspréngt de laange Kapp um Schëllerblat an déi zwéin aner op der Récksäit vun der Schank am Ueweraarm (dem Humerus). An där anerer Richtung ginn all dräi Käpp iwwer d'Ielebougelenk ewech a setzen un enger Schank vum Ënneraarm un, der Ulna.^[2]

Bei den Déieren ass den Opbau vum Trizeps heiansdo anescht; e ka méi oder manner wéi dräi Muskelkäpp hunn.^[3]^[4]

Beim Strecke vum Ielebou zitt den Trizeps sech zesummen (Kontraktioun) a beim Béie vum Ielebou deent e sech aus (Dekontraktioun). De laange Kapp zitt sech och zesumme, wann den Aarm hannert de Réck geet, well en hannert dem Schëllergelenk festgemaach ass.

Biller

Animatioun vun engem Trizeps um mënschleche Skelett: de laange Kapp (rout), de säitleche Kapp (giel) an de mëttlere Kapp (gréng).
Animatioun mat der Kontraktioun an der Dekontraktioun vum Trizeps beim Mënsch.
Déi selwecht Animatioun mat Trizeps a Bizeps.
Schema mat Bizeps an Trizeps.