Assurance
Vu Wikipedia, der fräier Enzyklopedie.
 |
Dësen Artikel ass eréischt just eng Skizz. Wann der méi iwwer dëst Thema wësst, sidd der häerzlech invitéiert aus dëse puer Sätz e richtegen Artikel ze schreiwen. Wann dir Hëllef braucht beim Schreiwen, da luusst bis an d'FAQ eran. |
Eng Assurance oder Versécherung ass eng Operatioun, déi um Prinzip vum der Iwwerhuelen vun engem Risiko berout. Duerfir gëtt e Geldbetrag, dat heescht eng Primm, bezuelt, déi an en Dëppe fléisst. Aus dësem Dëppen, dat vun enger Assurance-Gesellschafz oder engem Assurance-Organ verwalt gëtt, ginn d'Assureeën bezuelt, wann de Risikofall antrétt. Virausetzung ass dat d'Antrédden vum Risikofall an de Betrag, dee fälleg gëtt, no versécherungsmathemateschen a statisteschen Methoden bestëmmt ka ginn.
[Änneren] De Verséchérungsvertrag
Eng Versécherung baséiert op engem gedréckten Kontrakt, och Police genannt, dee tëschent de zwou Parteien, dem Versëcherten (Assuré) an dëm Versécherer (Assureur),ofgeschloss ass. Hien enthält d'Klauselen mat de Conditiounen ënner deenen eng Versécherung zur Auswierkung kënnt. Ënnerscheed dobäi ginn:
- allgemeng Condiounen oder conditions géénérales (Dat sinn déi kleng gedréckten Stipulatiounen an der Police) an
- déi eegen Conditiounen oder conditions particulières, déi bei engem bestëmmten Kontrakt applizéiert ginn an déi vun den allgemengen Bedingungen ofwäichen oder se ergänzen kënnen.
E Versécherungskontrakt kann an der Zäit begrenzt sinn, oder erneierbar sinn. (automatesch , wann nët schrëftlech gekënnegt gëtt oder op ausdrécklechen Accord vun de zwou Parteien.
[Änneren] Deckungsprinzipien
Wat d'Deckung vun de Risiken ubetrëfft, sou ginn et zwou Methoden:
- D'Kapitaldeckungsverfahren (fr.:système de capitalisation des primes). An deem Sytem dat normalerweis bei Persounenversécherungen am Privatsecteur applizéiert gëtt, ginn déi eenzel kapitaliséiert Primmen Reserven zougefouert, an zwar an dem nouwännege Moss fir den eenzelnen festgeluechten Betrag ze bezuelen, da wann de Risikofall antrëtt.
- D'Umlageverfahren, oder fr.:Système de répartition, ass déi Method, zu där haaptsächlech déi gesetzlech Versëcherungen vun deem Moment un iwwergange sinn, wéi duerch d'Rentenopbesserungen déi kapitaliséiert Reserven nimméi duergange sinn, fir déi fälleg Beträg ze bezuelen. Dëse System stéisst dann op Schwieregkeeten, wann d'Populatioun an domatt déi abezuelt Primmen ofhuelen an d'Primmenopkommen nët méi duergeet fir déi fälleg Fäll auzebezuelen. Dann ass dëse System op ëffentlech Zouschëss ugewis.
[Änneren] Kategorien vun Assurancen
Et ginn dräi grouss Kategorien vu Versécherungen:
- d'Versécherung vu Persounen
- d'Versécherung Saachen
- d'Haftpflicht-Versécherung, dat heescht d'Versécherung vun enger gesetzlech festgeluechter Responsabilitéit
[Änneren] d'Versécherung vu Persounen
Hei handelt et sech haaptsächlech ëm d'Liewensversécherung, déi entweder
- beim Dout oder
- beim Iwwerliewen no enger gewësser Zuel vu Joeren fälleg gëtt.
- Eng drëtt Form vu Liewensversécherung ass d'combinéiert Versécherung, déi am Fall vum Dout oder awwer beim Iwwerliewen no de stipuléierten Joeren ausbezuelt ka ginn.
Eng Liewensvwersëcherung gesäit als Géigeleeschtung vum Assuré entweeder d'Abezuelen vun engem
- eemolegen Kapital duerch den Assuré oder de Versement vu
- monatlechen, véirel- oder ganzjähregen Primmen vir.
Bei der Fällegkeet bezuelt d'Assurance, jee nodeem wat vereinbart gouf, entweedwer e feste Kapital un de Versécherten oder un déi vun him désignéiert Persounen aus, oder si beuelt him eng Rent, meeschtens ob monatlecher Grondlag. Am läschte Fall handelt et sech ëm eng typesch Renteversécherung. Schléisslech ginn et Assurancen, déi op ee Kapp oder op méi wéi ee Kapp ofgeschloss ginn.
Dat heescht, dat d'Berechnung vun enger Liewensversécherung an de noutwännege Réckstellungen nët einfach ass an eng besonnesch Schoulung vun engem spezialiséierten Versécherungsmathematiker, dem Aktuär, wéi e genannt gëtt, erfuerdert.
[Änneren] d'Versécherung vu Saachen
D'Versécherung vu Saachen oder assurance de choses besteet doranner, fir de Schued ofzedecken, deen entsteet, wann en Objet geholl oder zerstéiert gëtt. D'assurance géint Déifstall (assurance-vol) an d'Féierversëcherung (assurance-incendie) sinn typesch Saachversëcherungen.
Bei de Saachversécherungen heescht et oppassen, datt een net ënner- oder iwwerverséchert ass. Am Fall vun enger Ënnerversécherung applizéiert d'Gesellscht déi sougenannten proportional Regel; dat bedäit, dat se net de volle Wert rembourséiert, mä nëmmen de Wert deen am Verhältness zur versécherter Valeur steet. Bei enger Iwwerversëcherung gëtt hëchstens den tatsächlechen Wert als Grondlag fir d'Berechnung vum Schued geholl, well et verbued ass, iwwert d'Versécherung vun enger Saach e Benefice ze maachen. Et ginn allerdengs Ausnahmen. Bei Tableauen z.B. kann een vum Assureur de Wert agreeéieren lossen. Am Schuedfall rembourséiert d'Assurance dann den agreeéierten Wert.
[Änneren] d'Haftpflicht-Versécherung
Eng Haftplichtversécherung ënnerscheed sech vun enger Saachvers¨cgerung doduerch, dat se e Schued ofdeckt, deen op der Passivsäit vun der Bilanz zum Virschain kënnt an dee sech aus der gesetzlescher Obligatioun ergëtt, a verschiddenen, am Gesetz festgeluechten Fäll ze haften (Artikelen 1382-1386 vum Code civil). D'Autoshaftpflicht, d'Famillhaftpflicht sinn hei typesch Fäll. E Spezialfall ass allerdengs eng Casco, souwäit se niewent der gewéinlecher Haftbarkeet vum Propriétaire vum Won och den eegenen Schued um Gefier, fir deen keng Drëttpersoun haftbar gemeet ka ginn, ofdeckt. D'Haftpflichten decken nët automatesch de volle Schued of. Limiten kënne festgeluecht ginn oder Franchisen stipuléiert ginn (Eng Franchise ass eng ënnescht Grenz vum Schued, déi iwwerschratt muss sinn, fir dat den Assureur de Schued bezuelt.
[Änneren] Obligatoresch a netobligatoresch Assurancen
Ënnerscheed gët och tëschent obligatoreschen a netobligatoreschen Versëcherungen.
- Eng obligatoresch Versëcherung. ass déi Assurance, déi opgrond vu gesetzleche Bestëmmungen zwangsweis contractéiert muss ginn. Een typecht Beispill ass d'Autoshaftpflicht-Versécherung. D'Pensiounsversécherung ass och an de meeschten Industrielänner fir all beruffstäteg Persounen obligatoresch.
- Nëtobligatoresch Versécherungen sinn all déi aner Versécherungen, déi op fräiwëlleger Grondlag ofgeschloss ginn.
[Änneren] Assurance-Organen
Et ginn verschidden Versécherungsorganen:
- Déi staatlech oder staatlech organiséiert Pensiouns- oder Krankekeesen
- D'privat Versëcherungsgesellschaften
- d'Mutuellen: Dat sinn nët kommerziell Persounengesellschaften, déi nom Mutalitéitsprinzip organiséiert sinn an déi mat Fongen vun hire Memberen deenen hir Risikofäll ofdecken. Et handelt sech dobäi meeschtens ëm Organen, déi op sozialem Gebitt d'Kranken- an d'Stierwekäschten, déi iwwert déi vun den öffentlechen Sozialversécherungen rausginn, iwwerhuelen. Verschidde Mutuellen bezuelen och Zousazpensiounen.
[Änneren] Coassurance an Reassurance
[Änneren] D'Intermediairen am Assurancegeschäft
- D'Agenten: Een Agent ass de Vertrieder vun enger Versécherungsgesellschaft. Hien oder, e Stack driwwer, de Generalagent, darfen fir all Branche nëmmen bei enger eenzelner Versécherungsgesellschaft zougeloss sinn. Si handelen am Optrag vun hirer Assurancegesellschaft.
- D'Courtieren dergéint handelen am Optrag vum Versécherten: Hir Missioun besteet doranner,de Contact mat sämtlechen Assurance-Gesellschaften am Interët vum Assuré, dee si beoptragt huet, opriichtzeerhalen, a sou fir hien déi gënstegst Condituounen rauszeschloen.
Bis 1991 gouf et zu Lëtzebuerg - op d'manst offiziell - keng Courtierën . Well awer eng international Assurance-Plaz, wéi Lëtzebuerg eng wëllt sinn, ouni Courtierën net denkbar ass, gouf duerch d'Gesetz vum 6. Dezember 1991 iwwert den Assurance-Secteur och d'Veraussetzung fir d'Zoulossen vu Courtierën zu Lëtzebuerg geschaf.
[Änneren] D'Assurancenopsiicht
[Änneren] Lëtzebuerg, eng international Assuranceplaz
Zu Lëtzebuerg goufen et vun de Joeren nom Zweete Weltkrich un Usätz zur Entwëcklung vun enger internationaler Versécherungstätegkeet. Wéi du d'Europäesch Commisioun Dispositiounen geholl huet, fir den Dëngschtleeschtungsverkéier an Europa iwwer d'Grenze weg ze liberaliséieren, sinn dës nei Méiglechketten vu der Finanzplaz Lëtzebuerg och am Assurancesecteur konsequent genotzt ginn.
[Änneren] Geschicht
[Änneren] Kuckt och
- Finanzplaz Lëtzebuerg
- Eegeversécherung vu groussen internationalen Entreprisen
- Assurancenopsiicht
- Reassurance
- Associatioun vun den Assurancegesellschaften
