Port-au-Prince

Vu Wikipedia
De Presidentepalais zu Port-au-Prince, ier e vum Äerdbiewen 2010 zerstéiert gouf.

Port-au-Prince (haitianesch Pòtoprens, spuenesch Puerto Príncipe) ass d'Haaptstad vun Haiti. Si läit am Golf vu Gonaïves an hat 2006 geschaten 1.275.000 Awunner (2,2 Milliounen, wann een d'Banlieue matzielt).

Geschicht[änneren | Quelltext änneren]

Port-au-Prince gouf 1749 vu franséische Zockerrouerplanzerte gegrënnt. 1770 huet et Cap-Haïtien als Haaptstad vun der franséischer Kolonie ofgeléist. 1804 gouf Port-au-Prince d'Haaptstad vum onofhängege Staat Haiti. 1861 gouf et Bëschofssëtz an 1944 gouf d'Université d'État d'Haïti gegrënnt.

Den 12. Januar 2010 gouf et um 16:53 Auer Lokalzäit e schwéiert Äerdbiewe vun der Stäerkt 7,6 MW, dat grouss Deeler vun der Stad an e Koup gehäit huet, a méi wéi 217.000 Doudesaffer mat sech bruecht huet.

Verkéier[änneren | Quelltext änneren]

Vu Port-au-Prince ginn 3 Haaptstroosse fort: D'Route Nationale 1 féiert vu Port-au-Prince aus op Cap-Haïtien am Norden. D'Route Nationale 2 verbënnt d'Haaptstad mat Les Cayes op der Tiburon-Hallefinsel. D'Route Nationale 3 verbënnt Port-au-Prince och mam Cap-Haitien, geet awer iwwer Mirebalais an Hinche.

Den internationalen Hafe vu Port-au-Prince, dee gréissten am Land, gouf beim Äerdbiewe staark beschiedegt. De Fluchhafen, nom Toussaint Louverture benannt, gouf 1940 ageweit an 1965 méi grouss gemaach. E läit 10 km nërdlech vun der Stad.

Kuckeswäertes[änneren | Quelltext änneren]

Bekannt Gebaier waren de Presidentepalais (Palais National) an d'Kathedral vu Port-au-Prince, si goufen allebéid vum Äerdbiewe vun 2010 zerstéiert.


Commons: Port-au-Prince – Biller, Videoen oder Audiodateien