Rolas

Vu Wikipedia
Wiesselen op: Navigatioun, sichen
Den Equator op der Insel Rolas südlech vu São Tomé
Déi bekannte Praia Café op Rolas

Rolas[1] ass eng 3 km² kleng Insel déi zum afrikaneschen Inselstaat São Tomé a Príncipe am Archipel vum Golf vu Guinea gehéiert. Si gehéiert zum Distrikt Caué an der Provënz São Tomé.

Dës vulkanesch Insel (net méi aktiv) läit direkt um Equator südlech vun der Insel São Tomé. Si ass virun allem fir hir wonnerschéi Plagen a Palme bekannt. Et kënnt ee just mam Schëff dohin, vu Porto Alegre aus, en Hafen am Süde vun der Insel São Tomé.

Sämtlech 200 permanent Awunner liewe vum Tourismus zanter e Luxusresort sech am Norde vun der Insel etabléiert huet. D'Uertschaft São Francisco läit och un der Nordküst vu Rolas. Um Nordrand markéiert e Monument déi genee Positioun vum Equator: eng Weltkaart aus Mosaik op där eng Messengsträif de Breedegrad "Null" markéiert an eng Sail d'Lag vun der Insel uweist.

An der Mëtt vun der Insel steet en ale Liichttuerm, dee nach a Betrib ass.

Ganz am Süde vu Rolas gëtt et e puer Furnas, eng Aart kleng Geysiren.

Referenzen[änneren | Quelltext änneren]

  1. Rolas gëtt och nach Ilha Gago Coutinho genannt, nom portugisesche Pilot, Geograph a Militär Gago Coutinho (1869-1959).
Commons: Ilhéu das Rolas – Biller, Videoen oder Audiodateien