Visegrád-Grupp
D'Visegrád-Grupp ass e labberen Zesummeschloss vun ufanks dräi, dono véier mëtteleuropäesche Staaten. Se gouf de 15. Februar 1991 vu Polen, der Tschecholslowakei an Ungarn an d'Liewe geruff. Wéi d'Tschecholslowakei sech gedeelt huet, goufen d'Nofolgerstaaten Tschechien an d'Slowakei Memberen.
Am Ufank war d'Zil vun dëse Länner, déi sech zënter kuerzem hire kommunistesche Regimer entleedegt haten, pragmatesch ze kucken, wou se gemeinsam Intressen an Defien hätten, fir sech do ofzeschwätzen. Ufanks waren dat Froen zum Ofzuch vun de sowjeteschen/russeschen Truppen an hire Länner, an d'Positionéierung vis-à-vis vun der NATO an der Europäescher Unioun (EU).
Zënter dassen alle véier zënter 2004 Member souwuel vun der NATO wéi och vun der EU sinn, huet d'Visegrád-Grupp e bëssen u Bedeitung verluer. Se äussert sech nach z.B. doranner, dass verschidde vun de Memberlänner gemeinsam diplomatesch Vertriedungen an Drëttlänner hunn. Och kulturellen a wëssenschaftlechen Austausch gëtt duerch si gefërdert.
D'Visegrád-Grupp kënnt zënter 1998 zweemol am Joer zesummen. Hiren Numm kënnt vun der ongrescher Stad Visegrád, wou den Traité ënnerschriwwe gouf, deen d'Grupp gegrënnt huet. Dës war erausgesicht ginn, well sech do schonns eng Kéier 1335 déi béimesch, ongresch a polnesch Kinneke getraff haten, fir wirtschaftlech-politesch Verhandlungen zu féieren.
[änneren] Um Spaweck
- Visegrad Group, en, cs, hu, pl, sk
- International Visegrad Fund (IVF)
- Cooperation of Visegrád Four Member Countries (V-4) in energy
- Visegrad Internet Magazine, en, cs, hu, pl, sk
