Oldtimer

Vu Wikipedia
Wiesselen op: Navigatioun, sichen
Opel Rekord 1700 P1 (1957-1960)
Peugeot P 111 (1931)
Hanomag R 16 B (1953)

Mam Begrëff Oldtimer bezeechent een zu Lëtzebuerg en Auto, dee méi al wéi 25 Joer ass. Et kann ee mat deem Wuert awer och e Camion, e Bus, e Motorrad oder en Trakter bezeechnen.

Eeler Autoen, déi awer nach net al genuch sin, fir zu den Oldtimere gerechent ze ginn, gi mam Begrëff Youngtimer bezeechent. De Begrëff Oldtimer kann een och fir aner Verkéiersmëttel wéi zum Beispiel Vëloen, Schëffer oder Zich benotzen oder souguer fir al Maschinne wéi z. B. Méidrescher. Am Ausland gëllt deelweis en aneren Alter, fir datt en Auto offiziell als Oldtimer bezeechent ka ginn.

D'Begrëffer Oldtimer a Youngtimer si Schäinanglizismen, déi an der englescher Sprooch keng oder eng aner Bedeitung hunn. Am Englesche gëtt amplaz vun Oldtimer de Begrëff Classic car, Veteran car oder Antique car benotzt.

Oldtimer gëtt deelweis och synonym mam Begrëff Veteran gebraucht. Veteran ass awer och eng Bezeechnung fir Oldtimer aus der Ufankszäit vum Automobilbau bis zum Éischte Weltkrich. Am Franséische gëtt amplaz vun Oldtimer de Begrëff Véhicule historique oder Voiture de collection benotzt.

Oldtimer sinn normalerweis Gefierer, déi wéinst hirer Raritéit e gewësse Sammlerwäert hunn an nëmmen nach geleeëentlech benotzt ginn. Den Zoustand kann allerdéngs staark variéieren, jee nodeem ob se restauréiert sinn oder net.

D'Sammler vun Oldtimer hunn dacks eng Tendenz, sech a Veräiner ze regruppéieren, entweder a Marke-Veräiner oder méi allgemeng Oldtimer-Veräiner. Veräiner, déi sech mam Sammelen an Erhale vun Oldtimer beschäftegen, sinn zu Lëtzebuerg gréisstendeels an der Lëtzebuerger Oldtimer-Federatioun (LOF) regruppéiert.

Literatur[änneren | Quelltext änneren]

Um Spaweck[änneren | Quelltext änneren]

Commons: Oldtimer – Biller, Videoen oder Audiodateien
Wiktionnaire: Oldtimer – Definitioun, Synonymer an Iwwersetzungen