Thabo Mbeki

Vu Wikipedia
Wiesselen op: Navigatioun, sichen
Den Thabo Mbeki (2003).

Den Thabo Mvuyelwa Mbeki, gebuer den 18. Juni 1942 zu Idutywa, Kaprovënz, haut Eastern Cape, war vun 1999 bis 2008 Staatspresident vu Südafrika. Hien ass de Jong vum Govan Mbeki, dee laang Joren am ANC aktiv war.

Hien ass 1962 an d'Vereenegt Kinnekräich an den Exil gaangen an huet do Economie studéiert. 1970/71 huet en an der Sowjetunioun eng Militärausbildung kritt. Zënter 1971 war hie Member am Féierungskader vum African National Congress (ANC). Vun 1984 u war hien do fir d'éischt Informatiounssekretär, duerno Porte-parole fir Aussepolitik. Vun 1990 un, wéi e bis aus dem Exil zréckkoum, huet hien och fir den ANC mat der wäisser Minoritéitsregierung verhandelt.

1994, no den éischte fräie Walen, gouf de Mbeki Vizepresident an der Regierung vun der nationaler Eenheet ënner dem Nelson Mandela. Am Dezember 1997 gouf hien dem Mandela säin Nofolger als President vum ANC an 1999 als Staatspresident vun der Republik Südafrika. No de Parlamentswale vun 2004 gouf hien den 23. Abrëll erëmgewielt an de 27. Abrëll, dem zéngten Anniversaire vum offiziellen Enn vun der Apartheid, vereedegt.

Vu Juli 2002 bis Juli 2003 war e President vun der Afrikanescher Unioun.

De Mbeki stoung während senger Amtszäit alt an der Kritik wéinst senger Haltung vis-à-vis vum Diktator vu Simbabwe, Robert Mugabe, a sengen onwëssenschaftlechen Aussoen zu Aids, z. B., datt en antiretrovirale Medikamenter d'Wierksamkeet ofgeschwat huet.

Literatur[änneren | Quelltext änneren]

  • William Mervin Gumede: Thabo Mbeki and the battle for the heart and soul of the ANC. Zebra Press, Kapstadt 2005, ISBN 1-77007-092-3.
  • Allister Sparks: Beyond the miracle. University of Chicago Press, Chicago 2003, ISBN 0-226-76858-9.

Um Spaweck[änneren | Quelltext änneren]

Commons: Thabo Mbeki – Biller, Videoen oder Audiodateien