Attack on Titan

Vu Wikipedia
Op d'Navigatioun wiesselen Op d'Siche wiesselen

Attack on Titan (lëtz. "Ugrëff op den Titan"; jap. 進撃の巨人, Shingeki no Kyojin, lëtz. "Gigant deen ugräift") ass eng Manga-Serie vum japaneschen Zeechner Hajime Isayama. De Manga gouf och als Anime ëmgesat an huet eng Rei Manga-Spin-offs an aner Ëmsetzunge kritt.

D'Wierk gehéiert zum Genre Action, Horror a Fantasy an huet ënner anerem 2011 de Kõdansha-Manga Präis an der Kategorie Shonen gewonnen.

Handlung[änneren | Quelltext änneren]

D'Handlung spillt haaptsächlech ëm de jonke Protagonist Eren Jäger, seng Adoptivschwëster Mikasa Ackermann a säi beschte Kolleeg Armin Arlert, déi wéi de verbliwwene Rescht vun der mënschlecher Spezies hiert d'Liewen hannert enger riseger Mauer verbréngen, wou se virun den Titane geschützt sinn. Déi enorm Mauer huet 107 Joer laang Schutz virun dëse Wiesen gebueden, déi d'Mënschen ouni Grond joen an iessen. Enges Daags duerchbriechen d'Titanen awer déi baussenzeg Mauer mam Numm Maria an drécken d'Mënschen ëmmer weider an hir verbliwwen Territoiren zréck. Wärenddeem verléiert den Eren seng Mam a säin Doheem a muss sech wéi de Rescht vun den Iwwerliewenden hannert der Mauer Rose a Sécherheet bréngen. Den Eren, deen hëlleflos nogekuckt huet wéi en Titan seng Mamm lieweg gefriess huet, huet deen Dag geschwuer, d'Titanen ze bekämpfen. Um Rand vun der Nidderlag huet d'Mënschheet versicht d'baussenzeg Mauer zréckzegewannen wëll souvill Mënschen net konnte vollstänneg erniert ginn. 1/5 vun der Bevëlkerung gouf geaffert, well déi riseg Titanen net konnten bezwonge ginn. Zwee Joer méi spéit mellen den Eren, seng Schwëster an de Kolleeg sech an der Militärschoul un. Kuerz virun der Ofschlosszeremonie gëtt de Mauerbezierk Trost vun den Titanen ugegraff. Vill vun den neie Kadette komme beim Géigenugrëff ëm, mä e mysteriéisen Titan gräift dobäi och aner Titanen un. Nodeems sech erausgestallt huet datt et den Eren war, probéiert d'Arméi hie fir hir Zwecker ze benotzen. En neien Ugrëff op déi vun den Titanen besat Stad mat Hëllef vum Eren an Titaneform stellt sech als éischt Victoire vun der Mënschheet eraus. D'Mënschheet krut dunn nei Hoffnung a mam Eren zersumme gëtt probéiert d'Mauer Maria erëm zréckzehuelen.

Titanen[änneren | Quelltext änneren]

Informatiounen iwwer d'Titanen[änneren | Quelltext änneren]

D'Titane sinn humanoid Wiesen, déi 3 bis 15 Meter grouss kënne ginn. D'Titane gläichen de Mënschen, hunn awer eng aner Anatomie. Si hu weiblech oder männlech Gesiichtszich mä hu keng Geschlechtsdeeler. Si hunn e Gehier, mä kee Verdauungsapparat. Dowéinst katze si déi gefriesse Mënschen nees eraus soubal se sech voll gefriess hunn. Meeschtens hunn d'Titanen iwwerproportional grouss Käpp a vill kleng rechteckeg Zänn. Obwuel d'Titane sou grouss sinn, si se vergläichsweis liicht. Hir Kierpertemperatur ass däitlech méi héich wei déi vun Mënschen. Titane sinn daagsiwwer aktiv a brauchen dofir d'Sonneliicht.

Gewéinlech Titanen wéi och anormal Titanen sinn nëmmen wéineg intelligent. Well se sou grouuss sinn, misste se eigentlech vill Energie brauchen, mä se schéngen keen anert Iessen ausser Mënschen ze hunn. Dobäi si se och sou séier wéi e Päerd an hunn eng grouss Kraaft. D'Titanen erkennen hir Affer, andeems se pulséierend Liicht ophuelen. Soubal wéi ee vun hirer Kierperdeeler ofgetrennt gëtt, fänkt en u sech opzeléisen bis näischt méi do ass. An där Zäit wiisst den ofgetrennte Kierperdeel, dank hirer kuerzer Regeneratiounszäit, séier no. En Titan kann ee just mat engem déiwe Schnëtt an d'Genéck ëmbréngen. D'Titane ginn a verschidde Kategorien agedeelt.

Déi verschidden Titanekategorien[änneren | Quelltext änneren]

D'3-6 Meter grouss Titane sinn déi klengst an hu mënschenähnlech Proportiounen an en normaalt Behuelen. D'7 Meter grouss Titanen hunn e vergläichsweis grousse Kapp an eng afenähnlech gekrëmmt Kierperhaltung. D'15-Meter-Titane sinn déi gréisst Aart vun gewéinlechen Titanen an hunn erëm mënschenähnlech Proportiounen. Se gehéieren zu de 'rengen' Titanen an attackéieren all Mënsch, dee se gesinn. 

Anormal Titanen behuele sech net wéi gewéinlech Titanen an dowéinst gi se sou bezeechent. Als anormal bezeechent een, datt se beispillsweis eng gewëssen Intelligenz hunn oder amplaz dass s'eng grouss Mënschemass unzegräifen, se sech op eng Persoun fokusséieren. Anormal Titane konnte souguer schwätzen.

D'kolossal Titanen sinn an der Mauer selwer oder sinn a Gestalt vun engem 'Titanwandler' ze fannen. Déi Aart an der Mauer ass awer staark geschwächt well se wärend Joerhonnerte keng Sonn kruten. Déi lescht Kategorie vun Titane sinn déi schonn ernimm Titanwandler. Si kënne hier Gestalt tëscht mënschlecher an Titanegestalt änneren. An Titaneform behalen si awer hiert Bewosstsinn a kënnen intelligent denken. 

D'Organisatioun vom Militär[änneren | Quelltext änneren]

Den Militär op de Maueren huet sech am Laf vun der Zäit an dräi gréisser militäresch Branchen opgedeelt.

D’Mauergarnisoun[änneren | Quelltext änneren]

D’Mauergarnisoun (駐屯兵団, chūton heidan) ass déi gréisst Divisioun am Militär, déi direkt bei den Maueren fir Uerdnung suergt. Vue dat se mat den Zivilisten an de Stied no bei de Maueren beschäftegen, awer och am Kampf géint Titanen ausgebilt musse sinn, verfüügt d’Mauergarnisoun iwwer eng Rei Aufgaben. Beispillsweis mussen se sech kënne géint Titanen wieren, fir Sécherheet bannent de Mauere suergen an eeben déi Mënschemass kontrolléieren mee och kënne mat engem Gewier ëmgoen. D'Benotze vun de Kanounen wéi och d’Montéiere vu verschiddenen Infrastrukture gehéiert zu hiren Aufgaben. D'Divisioun ass eng 30.000 Mann grouss an a Regimenter agedeelt, woubäi all Regiment ëm déi 1.000 Zaldoten huet.

D'Opklärungstrupp[änneren | Quelltext änneren]

D'Opklärungstrupp (調査兵団, chōsa heidan) agéiert baussent de Maueren. Si konzentréiert sech haaptsächlech op d'Zeréckeruewere vun der Mauer Maria an de Gebidder dertëschent. Virum Fall vun der Mauer Maria war hir Haaptaufgab virun allem d'Landschaft déisäit der baussechter Mauer ze exploréieren an d'Titanen ze ënnersichen. Bei esou Expeditioune kënnt am Duerchschnëtt nëmmen d'Halschent vun den Zaldoten lieweg erëm. Dobäi huet déi Militärbranche scho mat enger niddreger Zuel un neie Rekrutten ze kämpfen. Dofir hunn d'Veteranen eng mat der héchster Disziplin an zielen zu de beschten Zaldoten vun der ganzer Arméi, well se sech oft hu misse géint Titanen duerchsetzen.

Militärpolice[änneren | Quelltext änneren]

D’Militärpolice (憲兵団, kempeidan) suergt fir d'Uerdnung bannent de Mauere vum Räich an ass dem Kinnek direkt ënnerstellt. Se sinn d'primär Policeeenheeten am mënschlechen Territoire a mussen dowéinst ni géint d'Titane kämpfen. Si sinn net, wéi déi aner Branchen, mat moderner 3D- Ausrüstung equipéiert, ma hunn normal Schosswaffen. Zu de weideren Aufgabe gehéieren och d’Steieren andreiwen. Nëmmen déi zéng bescht Rekrutten aus engem Ausbildungsjoer kënne sech fir d'Militärpolice umellen. Trotz dëser strenger Selektioun ass d’Militärpolice e korrupte System mat ondisziplinéierten a lidderegen Zaldoten. 

3D-Manöver-Apparat[änneren | Quelltext änneren]

Den 3D-Manöver-Apparat (立体機動装置 Rittai kidō sōchi) ass een vun Mënschen entwéckelt Equipement wat eng méi grouss Beweeglechkeet géint Titanen am Kampf erméiglecht. Et besteet aus engem 3D-Manövréirungs-Antrieb, Eisendrot mat Anker, Gasfläschen an eebe Schwäerter mat Scheeken. D’Material ass besonnesch licht an robust an besteet aus Eisenbambus. Mat Hëllef dëser Technik sinn d’Mënschen fäeg sech géint Titanen ze wieren an se ëmzebréngen. Virun dëser Erfindung war et praktesch onméiglech Titanen ëmzebréngen. Kanounen an all aner Schosswaffen waren sënnlos géint déi iwwermächteg Titanen.

Territoire an d’Maueren[änneren | Quelltext änneren]

D’Maueren Maria, Rose an Sina sinn an engem konzentreschen Krees opgebaut. Géif den Opbau allerdéngs just bei engem einfachen kreesfërmegen Reng bleiwen, wier et onméiglech d’Maueren ze verdeedegen soubal se géifen duerchbrach ginn. Engersäits ginn d’Ressourcen net duer fir den ganzen Reng ze verdeedegen an anerersäits sinn d’Maueren sou laang, dat een net wëssen kann wou d’Titanen wäerten duerchbriechen. D’Architekten hunn dowéinst bestëmmt Distriktstied bauen gelooss fir d’Ugrëffsfläch vun den Titanen méiglech kleng ze halen. D’Distrikter sinn ausserhalb mee direkt un den Maueren ugebaut an sinn selwer och vun enger Mauer ëmkreest. Sou gesot dengen d’Distrikter als Köderen fir d’Titanen. All d’Maueren sinn ongeféier 50 Meter héich an 10 Meter breet an sinn duerch Kolossaltitanen verstäerkt ginn. Gréisst Schwaachstell vun den Maueren sinn hier Dieren.  D’Mauer Maria ass déi längst Mauer an ass mat enger Rei Waffen an Eisebunnsnetzer verbonnen. Tëschent der Mauer Maria an der Mauer Rose befannen sech 100 km Ofstand. Bekannt Distrikter sinn am Süden Shiganshina an am Westen Quinta.  D’Mauer Rose situéiert sech an der Mëtt vun den aneren zwee Maueren an verfüügt och iwwer Verdeedegungsméiglechkeeten. tëschent der Mauer Rose an der Mauer Sina befannen sech 130 km Ofstand. Déi verschidden Distrikter heeschen Trost am Süden, Krolva am Westen, Utopia am Norden an Karanese am Osten. Doniewent befannen sech nach am Süden an am Südwesten kleng Dierfer wei Jinae, Dauper an Ragako.  D’Mauer Sina ass déi lescht Mauer an huet en Radius vun 250 km. Doranner situéiert sech och d’Haaptstad Mitras wou den Kinnek regéiert. Déi verschidden Distrikter heeschen Ehrmich am Süden, Orvud am Norden, Stohess am Norden an Yarckel am Westen.

Verëffentlechung[änneren | Quelltext änneren]

Hajime Isayama huet am Joer 2006 den Nowuesskënschtler-Preis MGP (Magasinn Grand Prix) fir Kõdanshas gewonnen, obwuel seng Zeechnung kritiséiert mee awer och fir hier Originalitéit an Presentatioun gelueft gouf. Als éischt huet en fir den Manga ze verëffentlechen, versicht déi gréisst Redaktioun fir Manga aus Japan Shūeisha fir sech ze iwwerzeegen. Nodeems si awer eng Upassung vum Stil an der Handlung fir hir eegen Zilgrupp wollten duerchsetzen, huet Hajime sech erëm der Redaktioun Kõdanshas ugeschloss. Do huet en dann den Manga hingeki no Kyojin, mam engleschen Ënnertitel attack on titan, ab dem 9. September 2009 publizéiert. An 27 Sammelbänn goufen d’Kapitelen zesummegefaasst. Den Manga gouf an méi wei aacht Sproochen an méi wei zéng Länner publizéiert. 2014 huet den Titel souguer den Harvey Award an der Kategorie Best American Edition of Foreign Materialv(„bescht amerikanesch Verëffentlechung vun auslänneschem Material“). Den Manga gouf 660’000 mol an den Vereenegten Staaten, 530’000 mol an Südkorea an 420’000 mol an Taiwan verkaf.

Referencen[änneren | Quelltext änneren]

1. https://attackontitan.fandom.com/de/wiki/Attack_on_Titan_Wiki 2. https://www.animexx.de/wiki/index.php/Attack_on_Titan 3. https://de.wikipedia.org/wiki/Attack_on_Titan