Broschtvergréisserung

Vu Wikipedia
Op d'Navigatioun wiesselen Op d'Siche wiesselen
Erste hilfe.svg Dësen Artikel gehéiert zur Serie vun de Medezin-Artikelen. Dës Informatioune sinn zur allgemenger Weiderbildung geduecht, mä ersetzen op kee Fall en Dokter oder Apdikter! Och d'Éischt Hëllef-Rotschléi kënnen op kee Fall mat engem richtegen Éischt-Hëllef-Cours gläichgesat ginn!
Broschtvergréisserung: virdrun an duerno

Eng Broschtvergréisserung ass e plastesch-rekonstruktive chirurgeschen Agrëff bei deem eng Prothes agesat gëtt fir de Volume vun enger weiblecher Broscht ze vergréisseren.

Munnechmol handelt et sech dobäi ëm eng medezinesch indizéiert Operatioun, z.B. wann no enger Broschtamputatioun nees eng Rekonstruktioun gemaach soll ginn. Meeschtens ginn esou Operatiounen awer aus reng ästhetesche Grënn gemaach; virun esou engem Agrëff soll eng Consultatioun erfollegen op de reelle Gronn net éischter psychologescher Natur ass an anescht geléist muss ginn[1].

Gemenkerhand ginn Implantater geholl, deer hir Baussenhaut aus mëllem Silikon ass, an déi mat physiologescher Kachsalzléisung oder mat Silikongel gefëllt sinn. Aner Variante mat Sojaueleg oder aus Polypropylen hunn aus prakteschen oder gesondheetleche Grënn nees vum Marché geholl misse ginn.

Bei der meschtens a Vollnarkos gemaachen Operatioun gëtt vun engem Fachchirurg als éischt en Hautschnëtt gemaach, deen een herno sou mann wéi méiglech soll gesinn, an deen dowéinst entweder an der nei forméierter Ënnerbroschtfal (inframammären Zougank), ëm oder duerch de Waarzenhaff (transareolären Zougank), ënnert dem Aarm (transaxillären Zougank) oder beim Gebrauch vu Kachsalzléisung och am Bauchnuebel placéiert ka ginn.

Duerno gëtt de Broschttissu uegehuewen an eng Zort Täsch geformt an déi d'Implantat kënnt, entweder deelweis oder vollstänneg ënnert de Broschtmuskel (submuskulär Implantatioun, v. a. bei ganz dënne Frae mat wéineg Fett-/Drüsentissu), oder ënnert der Broschtdrüs iwwer dem Broschtmuskel (subglandulär Implantatioun), oder direkt bannent der Muskelstrëmp an ënner d'Faszien-Schicht déi de Muskel bedeckt (subfaszial Implantatioun).

D'Kriibsrisiko bei Frae mat Broschtimplantater ass net méi grouss wéi bei der Moyenne vun der Populatioun. Et ass awer dovun auszegoen, datt d'Implantater net e Liewe laang kënnen drableiwen, mä mat längerem Liewensalter bei enger neier Operatioun nees erausgeholl oder ausgetosch musse ginn. Grënn heifir si Rupturen, Falebildungen, Asymmetrien, Läinzeechebildungen, Péng an Infektiounen. Besonnesch uerg gi kann et bei enger Friemkierperreaktioun oder engem Rass am Silikon-Transplantat, déi zu staarke Verformunge vun der Broscht oder och enger Geschwulst féiere kënnen.

Um Spaweck[änneren | Quelltext änneren]

Commons: Broschtvergréisserung – Biller, Videoen oder Audiodateien

Referenzen[Quelltext änneren]

  1. Sarwer DB, Brown GK, Evans DL. (2007), Cosmetic breast augmentation and suicide, Am J Psychiatry, Juli 2007; 164(7):1006-13 (Resumé)