Vhils

Vu Wikipedia
Op d'Navigatioun wiesselen Op d'Siche wiesselen
De Vhils a Portugal (2017)

De Vhils, gebuer de 15. Februar 1987 zu Lissabon[1] als Alexandre Manuel Dias Farto,[2] ass e portugisesche Moler a Graffitikënschtler.

Hien ass zu Seixal bei Lissabon opgewuess[2] an huet sech am Alter vun 10 Joer fir d'éischt fir Graffiti interesséiert. Mat 13 huet hien an der Strooss gemoolt, fir d'éischt op Maueren, duerno op Zich (sougenannten "train-bombing"), entweder mat Frënn oder eleng.[3] Spéider ass hien och iwwer d'Grenze vu Portugal ewech aktiv gi fir Zich ze molen.[2] Ëm 2003/2004 huet de Vhils dunn och ugefaangen mat aneren Technike wéi Pechbiller oder Affichen ze schaffen.[1]

Eng éischt Opmierksamkeet krute seng Wierker zu Lissabon, wéinst senger Technik déi dora besteet duerch vill verschidde Schichte vu Reklammsposteren ze schneiden fir esou e Gesiicht ervirzebréngen.[1] 2008 huet hie säi Konschtstudium zu London ofgeschloss. Säin Duerchbroch hat hien an derselwechter Stad, wéi hien invitéiert gouf um Cans Festival vum berühmte Graffitikënschtler Banksy auszestellen. Eng Foto vu sengem Wierk war op der Titelsäit vun der Zeitung The Times ze gesinn.[1] Dat huet et him erlaabt, a Kontakt mat grousse Galerien an England an an Italien ze kommen.

Zënterhir huet hien a ville Stied op der Welt geschafft oder ausgestallt, dorënner Moskau, New York, Los Angeles, Grottaglie, Shanghai, Bogota a Rio de Janeiro.[3] Och zu Lëtzebuerg ass am Freeport Lëtzebuerg um Findel e Wierk vun him ze gesinn.[4]

2012 hat hien e Wandbild op eng Fassad zu Déifferdeng gemaach.[5]

Den Numm Vhils huet keng Bedeitung, den Alexandre Farto benotzt en nëmmen, well e sech aus de Buschtawen zesummesetzt, déi hien am léifste benotzt a well den Numm séier ze schreiwen ass.[1][3]

Wierker (Auswiel)[änneren | Quelltext änneren]

Um Spaweck[änneren | Quelltext änneren]

Referenzen[Quelltext änneren]

  1. 1,0 1,1 1,2 1,3 1,4 Presentatioun op stencilrevolution.com
  2. 2,0 2,1 2,2 Presentatioun op escritoriodearte.com
  3. 3,0 3,1 3,2 The Independant (online): Vhils: The art of urban decay (28. November 2012)
  4. Vhils: Da rua para o Freeport, o armazém dos super-ricos (23. Mee 2014)
  5. New Vhils wall in Luxembourg (21. Mäerz 2012)