Batterie (Musek)

Vu Wikipedia
(Virugeleet vu(n) Drumset)
Op d'Navigatioun wiesselen Op d'Siche wiesselen
1. Crash-Deckel. 2. Déif Tom. 3. Héich a mëttelst Tom. 4. Déck Tromm. 5. Kleng Tromm. 6. Hi-Hat.

Eng Batterie oder e Schlogezei (en[1]: drum set, drum kit) ass en Ensembel vu Perkussiounsinstrumenter, dat aus verschiddenen Trommen an Deckele besteet: kleng a grouss Tromm, 2 bis 3 Toms, een Hi-Hat, verschidde Jummdeckelen a weider kleng Perkussiounsinstrumenter wéi Holzbléck, Kouklacken a Schellekranz.

D'Schlogezei gëtt a ville Museksformen agesat (Orchestermusek, Pop, Jazz, Rock, Metal, asw.) a gëtt vum Batteur (Drummer) mat Hänn a Féiss gespillt:

Déi eenzel Bestanddeeler vum Schlogezei[änneren | Quelltext änneren]

Kleng Tromm[änneren | Quelltext änneren]

Déi kleng Tromm (snare Drum) ass den Haaptdeel a sou feste Bestanddeel vun enger Batterie. D'kleng Tromm steet direkt virum Batteur a gëtt mat den Drumsticks gespillt. D'Snare Drum gëtt en hellen Toun vu sech.

Déck Tromm[änneren | Quelltext änneren]

Déi déck Tromm (bass drum) ass de gréisste Bestanddeel vun enger Batterie. Si steet um Buedem an ass op béide Säiten ofgestäipt. Si gëtt gewéinlech mam rietse Fouss iwwer eng Foussmaschinn gespillt, woubei en Hummer widder d'Tromm schléit. Déi déck Tromm gëtt e ganz déiwen Toun vu sech a gëtt bei quasi all Beat gebraucht.

Toms[änneren | Quelltext änneren]

Dat sinn zousätzlech Trommen, déi entweder op Stänneren um Buedem stinn, oder op der décker Tromm montéiert sinn. Meeschtens sinn et der dräi, déi ronderëm déi kleng Tromm placéiert sinn, meeschtens hirem Klang no: lénks déi héich Tom (high tom), an der Mëtt déi mëttelst Tom (mid tom) a riets, op Stänneren, déi déif Tom (low tom).

Deckelen[änneren | Quelltext änneren]

En Hi-Hat an ee bis dräi Jummdeckele stinn an Auerzäerrichtung an engem Hallefkrees ronderëm d'Trommen. Si ginn och mat de Schléier ugeschloen a ginn, ofhängeg vun der Festegkeet an der Häert vun de Schléier, verschidde grell Téin vu sech, well s'aus Metall sinn.

Hi-hat[änneren | Quelltext änneren]

Lénks vum Batteur, direkt nieft der klenger Tromm, steet en Hi-Hat. Dat ass en Instrument mat zwéi Jummdeckelen, déi iwwerenee festgemaach sinn a mat enger Fousspedal aktionéiert ginn. Den Hi-Hat kann deemno mam Fouss, mat de Schléier oder gläichzäiteg mat Fouss a Schléier gespillt ginn.

  • Fouss (w/foot): déi zwéi Jummdeckele gi widderenee gedréckt, an et entsteet e Klang, deen direkt gedämpft gëtt.
  • Schléier (w/open): wéi en normale Jummdeckel
  • Fouss a Schléier (w/closed): déi zwéi Jummdeckele leie widdereneen a ginn dann wéi en normale Jummdeckel ugeschloen. Well déi zwéin Deckelen net ganz platt sinn, existéiert en Huelraum, sou datt déi zesummegedréckt Jummdeckelen (closed hi-hat) domp vibréieren.

Jummdeckelen[änneren | Quelltext änneren]

Et gëtt verschidden Zorten vu Jummdeckelen:

  • Ride-Deckel (ride cymbal): e schwéieren Deckel, deen zimlech laang kléngt, wann en ugeschloe gëtt (= ride with the music); hie gëtt fir e regelméissege Rythmus (Groove) agesat a steet meeschtens riets vum Batteur iwwer der déiwer Tom.
  • Crash-Deckel (crash cymbal): dës méi liicht Deckelszort gëtt meeschtens net am Groove agesat, mä éischter fir Akzenter ze setzen.
  • Chineseschen Deckel (China cymbal): eng Zort Crash-Deckel mat héichgezunnenem Rand, deem säi Klang méi kuerz unhält a méi schmotzeg wierkt.
  • Splash-Deckel (splash cymbal): eng Zort Crash-Deckel, déi méi e klengen Duerchmiesser huet, an doduerch hell a sprëtzeg kléngt. Hie gëtt dowéinst fir Akzenter agesat. De Splash-Deckel steet dacks an der Mëtt direkt iwwer der klenger Tromm.

Notatioun[änneren | Quelltext änneren]

D'Noute fir d'Schlogezei ginn an normaler Notatioun geschriwwen mat engem neutralen Nouteschlëssel.

Déi eenzel Instrumenter aus Metall wéi d'Jummdeckele gi mat kräizfërmegen Noutekäpp duergestalt, déi verschidden Trommen mat normale ronnen Noutekäpp.

Schlogezei-Notatioun an haiteger Schreifweis. Toundokument Ofspillen ? / i

Um Spaweck[änneren | Quelltext änneren]

Commons: Drumset – Biller, Videoen oder Audiodateien

Referenzen an Notten[Quelltext änneren]

  1. An dësem Artikel ginn déi meescht Begrëffer a Bezeechnungen fir eenzel Perkussiounsinstrumenter op Englesch a Klamere gesat, ouni allkéiers "en:" derbäi ze setzen.