Gespär

E Gespär ass bei Holzkonstruktiounen en Drowierk, bei deem d'Haaptlaascht déi op den Drodunne läit duerch schréi Verstriewungen opgeholl gëtt, an doduerch gläichméisseg op d'Maueren, Sailen, oder aner Opleeër weidergeleet gëtt.

Gespärer ginn am Hausbau fir Daachkonstruktioune gebraucht, besonnesch bei Diech mat besonnesche Formen, déi net direkt duerch Maueren oder aner Stäipe gedroe ginn, an am Bréckebau.

D'Gespär fënnt een awer och am moderne Stolbau, a bei Eisebëtongskonstruktiounen am Bréckebau. Eng einfach Form vu Gespärer am Bréckebau sinn d'Fachwierkkonstruktiounen. Stäipe vun der rouder Bréck, sinn am Fong näischt anescht wéi e modernt stole Gespär.

A groussen Hale bestinn hëlze Gespärer hautdesdaags dacks aus geläimten Dunnen, Läimbënneren, déi duerch hir besonnesch Konstruktioun amstand sinn grouss Drowäiten ze garantéieren. Och am Bréckebau ginn dës agesat. Gespärer aus geläimten Dunnen hunn den Avantage datt se am Fall wou ee Feier ausbrécht, net sou séier zesummebriechen, wéi stole Konstruktiounen, déi sech béien, soubal wéi se eng gewëssen Temperatur kréien, ouni datt emol eng Flam drukënnt.

Bezeechnung vun de verschiddenen Deeler

Lëtzebuergesch	Franséisch	Däitsch
Viischt	panne faîtière	Firstpfette
Männchen	poinçon	Firstbänder
Iewescht Striew	contrefiche	Verstrebung
Iewescht Suel	faux-entrait	Kehlbalken
Gespiersuel	entrait	Ankerbalken
Daachholz/Puert	panne	Pfette
Dunn	solive	Deckbalken
Puertstriew	lien	Strebeband
Haaptzieder	arbalétier	Hauptsparren
Klengen Zieder	arbalétier de jouée	Stützbalken
Viischtstriew	lien	Strebeband
Gespärstriew	contrefiche	Gesperrstrebe
Käffer	chevron	Sparren

Bekannt Brécken déi mat hëlze Gespärer gebaut sinn

Ponte degli Alpini zu Bassano
Ponte dell'Accademia zu Venedeg
Kapellbrücke zu Luzern
Simmetalbrücke bei Wimmis an der Schwäiz
Teufelsbrücke bei Finkenberg an der Schwäiz
Wennerbrücke an der Steiermark
Crestabréck a Graubünden

Um Spaweck

Commons: Gespärer – Biller, Videoen oder Audiodateien