Migratioun

Migratiounen am Joer 2008

██ Positiv Migratioun ██ Stabil Situatioun ██ Negativ Migratioun ██ Keng Donnéeën

D'Migratioun (vum la: migratio,-onis) beschreift den Deplacement am Raum vun enger Persoun, Persounen oder souguer Populatiounen.

D'Migratioun ass e fräiwëllegen Deplacement vun engem Land / enger Regioun an een anert Land / eng aner Regioun aus ekonomeschen, politeschen oder kulturelle Grënn.

Et existéiere verschidden Zorte vu Migratiounen, wéi zum Beispill, d'Aarbechtsmigratioun (migration de travail), d'Schoulmigratioun (migration de qualification), déi forcéiert oder erzwonge Migratioun (migration forcée) oder och nach d'Migratioun aus Léift (migration d'amour).

Ënnert den Terme Migratioun, falen zwéin Ënnerbegrëffer:

• Emigratioun (Auswanderung)
• Immigratioun (Awanderung)

Dat si Migratiounen, déi iwwer d'Grenze vu Staaten ewechginn. D'Immigratioun an d'Emigratioun hunn u sech déi selwecht Motiver, et ass just eng Fro vun der Perspektiv, ob ee vun där enger oder där anerer Säit schwätzt, deemno mam Schwéierpunkt op dat Land, wou d'Migranten hierkommen, oder op dat, wou se sech néierloossen.

Bei der Migratioun spillen zwéi Facteuren eng Roll, de Pull- an de Push-Facteur. De Push-Facteur ass deen, deen een aus sengem Land 'erausdreift' (wéinst Aarmut, Perspektivlosegkeet vu Verbesserung vu senger Situatioun, Konflikter, Naturkatastrophen, asw.), iwwerdeems de Pull-Facteur deen ass, deen en anert Land attraktiv mécht (wéinst der Perspektiv op Aarbecht, op Sécherheet, asw.) De Push-Facteur fërdert d'Emigratioun, de Pull-Facteur d'Immigratioun.

Migrante verloossen hiert Heemechtsland mat der Intentioun an engem anere Land (dem Gaaschtland) fir eng bestëmmt, kuerz Zäit, respektiv eng méi laang Dauer, ze schaffen an och do wunnen ze bleiwen. A verschiddene Fäll bleiwe s'och fir de Rescht vun hirem Liewen am Gaaschtland wunnen. Allerdéngs kann et och zu fräiwëllegen, oder onfräiwëllege Retouren an déi jeeweileg Heemecht kommen.

Dëst Kapitel muss iwwerschafft ginn. Dat kann dru leien, datt Schreif- oder Tippfeeler dran ze fanne sinn, datt den Opbau net der Wikiformatéierung entsprécht oder datt den Inhalt net ganz korrekt ass oder net explizit genuch ass, sou wéi en den Ament do steet. Zousätzleche Grond: De Kontext feelt… ëm wat geet et?

Am November 2025 hunn iwwer e Dosen ONG-Rettungsschëffer, déi am Mëttelmier aktiv waren, all Kommunikatioun mat der libescher Küstewuecht ënnerbrach, well s'eng Eskalatioun vun der gewaltsamer Ofwier vun Asylbewerber um Mier an hiren Transfert a Lagere begrënnt hunn, wou Folter, Vergewaltegung an Zwangsaarbecht wäit verbreet sinn. Déi 13 Sich- a Rettungsorganisatiounen hunn hir Entscheedung als Ofleenung vum zouhuelenden Drock vun der EU beschriwwen.[1].

Kuckt och

• Migratioun zu Lëtzebuerg