Pass (Dokument)

Den aktuelle Modell vun engem lëtzebuergesche Pass (2016). D'Lächer dra maachen en ongëlteg.

E Pass (vum franséische passeport) ass en offiziellt Dokument a Form vun engem dënne Bichelchen, dat vun engem Staat ausgestallt gëtt an déi Persoun fir déi en ausgestallt gouf, den Titulaire, identifizéiert.

An engem Pass ass gewéinlech ë. a. eng Foto, dat sougenannte Passbild, den Numm, de Gebuertsdatum an d'Gebuertsplaz, d'Nationalitéit an d'Ënnerschrëft vum Titulaire ze fannen. Déi meescht Päss kënnen hautdesdaags mat Maschinne gelies ginn. Zanter e puer Joer ginn ëmmer méi systematesch biometresch Donnéeën op engem agebauten RFID-Chip ofgespäichert, fir et bal onméiglech ze maachen, e Pass ze fälschen, mä och, fir d'Kontrolle vun de Leit méi effikass ze maachen.

An engem Pass gëtt et eidel Säiten - meeschtens ëm déi 30, op déi d'Autoritéite vun deene Länner, an déi ee reest, Visae kënnen androen, déi et engem erlaben, meeschtens fir eng bestëmmt Dauer, an dat Land ze reesen. Op déi Säite kommen och d'Stempele mat Datumen déi uginn, wéini een an- a wéini ausgereest ass.

Bierger vun der Europäescher Unioun (EU) brauche kee Pass, fir bannent der EU, an an e puer Nopeschlänner, wéi z. B. d'Schwäiz ze reesen, dofir geet eng Identitéitskaart duer.

Et gëtt traditionell ënnerscheet tëscht engem gewéinleche "Reespass", engem "Diplomatepass", deen Diplomaten a soss diplomatesch Vertrieder vun engem Staat kréien, engem "Spezialpass", fir héichrangeg Regierungsvertrieder, an engem "Déngschtpass", dee Fonctionnairen, Beamten, oder anert Personal vun engem Land kréien, déi am Ausland ze dinn hunn, asw.

Digitale Pass

Am Oktober 2024 huet d'Europäesch Kommissioun dem Conseil an dem Europäesche Parlament eng Propositioun fir e Reglement iwwer d'Aféiere vun engem Digitale Pass virgeluecht. Ausserdem soll eng EU-Rees-Applikatioun geschaaft, an domat d'Reesen an der Europäescher Unioun méi sécher gemaach ginn.

Kuckt och

• Lëtzebuerger Pass

Um Spaweck

Commons: Päss – Biller, Videoen oder Audiodateien

• Règlement grand-ducal du 25 janvier 2008 fixant les modalités pour l'obtention d'un passeport biométrique (...)
• Règlement grand-ducal du 12 février 2015 portant exécution de la loi modifiée du 14 avril 1934, fixant les modalités pour l'obtention d'un passeport biométrique (...)