Europäesch Kommissioun

Vu Wikipedia
Wiesselen op: Navigatioun, sichen
D'Berlaymonts-Gebai zu Bréissel, Sëtz vun der Europäescher Kommissioun

D'Europäesch Kommissioun, offiziell: "Kommissioun vun den Europäesche Communautéiten", ass d'Exekutivorgan ënner den Europäeschen Institutiounen. Si hält souzesoen d'EU um Rullen.

Hir 4 Haaptfunktiounen[änneren | Quelltext änneren]

Se huet eng véierfach Roll: Fir d'éischt emol ass et si, déi europäesch Rechtsvirschrëften, (déi sougenannt Reglementer an Direktiven) ausschafft an dem Europäesche Parlament a Conseil virleet, datt déi sollen driwwer ofstëmmen. Dëst nennt een Initiativrecht. D'Europäesch Traitéë leeë fest, a wat fir Beräicher d'Kommissioun iwwerhaapt Virschléi maache kann: Dës si virun allem Transport, Industrie, Soziales, Landwirtschaft, Ëmwelt, Energie, Regionalentwecklung, Handel an Entwécklungshëllef. Geméiss dem Subsidiaritéitsprinzip kann d'Kommissioun nëmmen dann nei Initiative proposéieren, wann déi um Niveau vun der EU méi effizient sinn, wéi wa se géifen op nationalem, regionalem oder lokalem Plang organiséiert ginn.

Dann ass se dofir verantwortlech, datt déi sëllechen EU-Aktivitéiten ausgefouert ginn, a s'iwwerwaacht d'Gestioun vum EU-Budget. A verschiddene Beräicher, wéi z. B. der Konkurrenz, hunn d'Memberstaate si zu enger Zort Arbitter gemaach: si ka Strofe bei Karteller verhänken, Fusiounen oder staatlech Hëllefen un Entreprisë verbidden.

Schliisslech passt s'op, datt d'Europäesch Traitéen a Rechtsvirschrëften agehale ginn. Dat gëtt hir d'Méiglechkeet, eng Plainte géint e Memberstaat virum Europäesche Geriichtshaff ze maachen, wann dee sech net un déi Regelen, déi e mat vereinbart huet, hält.

Och vertrëtt d'Kommissioun, virun allem am Beräich Handel an Zesummenaarbecht, op weltwäitem Plang d'EU an hir Memberstaaten, an handelt an hirem Numm international Accorden aus.

Zesummesetzung an Aarbechtsweis[änneren | Quelltext änneren]

D'Jean-Monnet-Gebai um Kierchbierg

D'Europäesch Kommissioun besteet zanter dem Juli 2013 aus 28 Memberen, 1 pro EU-Memberstaat. Dat nennt een heiansdo och de Collège vun der Kommissioun. Si hëlt hir Decisioune mat enger Majoritéit vun hire Memberen (et mussen der deemno op d'mannst 13 (vun 2007 un: 14) zoustëmmen).

Ënnerstëtzt an hirer Aarbecht ginn dës Fraen a Männer vun enger 35.000 Beamten an Employéen. Dat kléngt no vill, 't sinn der awer net méi wéi bei enger mëttelgrousser Stad. Déi meescht Mataarbechter schaffen zu Bréissel, eng 2.000 zu Lëtzebuerg. Hiren offizielle Sëtz huet si zu Bréissel am Berlaymont, engem X-fërmege Gebai um Rond-point Schuman. Do donieft sinn hir Administratiounen an enger 60 Gebaier uechtert Bréissel verdeelt. Zu Lëtzebuerg sinn et eng hallef Dose Gebaier, um Kierchbierg an op der Cloche d'Or, wou d'Bureaue vun de Kommissiounsservicer ënnerbruecht sinn. Vun 2022 u sollen déi op enger eenzeger Plaz, dem Bâtiment Jean Monnet 2 um Kierchbierg zesummegelucht ginn, dat aus engem Gebai vun 23 Stäck an engem längelzeche mat hirer siwe bestoe soll.[1][2]

De Kommissiounspresident gëtt vun de Regierunge vun de Memberstaaten ausgesicht a muss vum Europäesche Parlament confirméiert ginn. Déi aner Kommissiounsmembere gi vun hirem Land, am Averständnes mam President, ernannt, a mussen och eng Majoritéit vun den Deputéierten iwwerzeege kënnen. D'Kommissioun gëtt op 5 Joer nominéiert, mä se kann duerch e Mësstrauensvote vum Parlament fréizäiteg heemgeschéckt ginn. De President fir säin Deel huet d'Recht, eenzel Memberen z'entloossen, wann hien et fir néideg fënnt.

D'Kommissioun ass onofhängeg vun de Regierunge vun de Memberstaaten an däerf eleng am Intressi vun der EU als Ganzes handelen.

Zënter November 2014 ass de Collège ënnert der Presidentschaft vum Jean-Claude Juncker am Amt.

  Méi Informatioun doriwwer am Artikel: Kommissioun Juncker Nuvola apps xmag.png

Kuckt och[änneren | Quelltext änneren]

Um Spaweck[änneren | Quelltext änneren]

Commons: Kommissäre vun der Europäescher Kommissioun – Biller, Videoen oder Audiodateien

Referenzen[Quelltext änneren]

  1. "Projet 'Jean Monnet 2' gouf virgestallt." rtl.lu, 28.10.2016, 09:00:53.
  2. "526,3 millions d’euros pour le Jean Monnet 2." paperjam.lu, 27 Octobre 2016 15:22.