Jean-Monnet-2-Gebai

Jean-Monnet-2-Gebai
	Réibau (Feb. 2024)
Land	Lëtzebuerg
Gemeng	Lëtzebuerg
Plaz	Kierchbierg
Strooss	Boulevard Konrad-Adenauer
Koordinaten	49°37'28,322"N, 6°8'48,912"O
Datum vum Bau	2018-2025
Opgaangen	2025
Proprietär	Europäesch Kommissioun
Ersat vun	Jean-Monnet-Gebai

D'Jean-Monnet-2-Gebai ass e Gebaikomplex an der Stad Lëtzebuerg, um Kierchbierg, um Boulevard Konrad-Adenauer, deen zanter 2018 am Gaang ass gebaut ze ginn (Stand: Sept. 2023). E besteet aus zwéi Gebaier: engem 8-stäckegen, 180 Meter laange Block mat enger Grondfläch vun 138.000 m², an engem 24-stäckegen Tuerm mat enger Grondfläch vun 52.000 m², déi um Rez-de-Chaussée an um 2. Stack matenee verbonne sinn. Et handelt sech ëm e Bürosgebai, dat vum Lëtzebuerger Staat fir d'Europäesch Kommissioun gebaut gëtt, fir dass déi do de Gros vun hirem Personal zu Lëtzebuerg ënnerzebrénge kann. Eng Parti dovun huet virdrun am Jean-Monnet-Gebai geschafft, bis s'op verschidden Gebaier als Tëscheléisung verdeelt goufen, well dëst ofgerappt gouf an duerch en Neibau, eeben de Jean-Monnet-2, ersat gëtt. Am ganze sinn dodran 3.600 Aarbechtsplaze virgesinn.

D'Entwërf vum Jean-Monnet-2-Gebai si vu KSP Jürgen Engel Architekten. De Grondstee gouf de 4. Juni 2018 geluecht, mam Zil, dass d'Aarbechten am Februar 2023 (Block), resp. Februar 2024 (Tuerm) sollte fäerdeg sinn. Ë. a, duerch d'COVID-19-Pandemie koum et zu Verspéidungen, soudatt d'Ouverture op d'mannst ee Joer no hanne verréckelt gouf (Stand Sept. 2023).

Wéi säi Virgängergebai gouf et nom Jean Monnet genannt.

Am Dezember 2024 gouf bekannt datt d'Käschte vum Bau vun ursprénglech 340 Milliounen op eng Milliard Euro geklomme sinn.^[1]