Spionage

Vu Wikipedia
Op d'Navigatioun wiesselen Op d'Siche wiesselen

Spionage nennt een d'Sammele vun Informatiounen, déi geheim oder vertraulech sinn, an et dofir vun deem, vu wou se hier sinn, net gewollt ass, datt se an aner Hänn kommen. Spionage ka vun enger Eenzelpersoun, oder awer vun enger Organisatioun bedriwwe ginn, meeschtens am Déngscht vun engem Land oder enger Firma. D'Spionage geschitt par Definitioun heemlech, well s'an de meeschte Fäll illegal a strofbar ass.

An de meeschte Fäll geet et bei Staatsspionage dorëms, politesch, wirtschaftlech oder militäresch Informatiounen iwwer de Géigner oder Feind ze kréien, déi engem nëtzlech kënne sinn; bei Wirtschaftspionage geet et dorëms, un d'konfidentiellt Wëssen iwwer betribswirtschaftlech, strategesch oder technesch Informatioune vu Firmen ze kommen.

Mat déi efficassten Aart a Weis, u Geheimwëssen ze kommen, ass duerch Infiltratioun, d.h. d'Aschleise vun engem Spioun an déi Organisatioun, déi ausspionéiert soll ginn. Dat ass dann d'Aufgab vun engem Spioun. Eng aner Méiglechkeet besteet doran, eng Persoun, déi fir de 'Géigner' schafft; 'ëmzedréien', an se sou dozou ze kréien, Informaatioune virunzeginn. Infiltratioun gëtt haut och ëmmer méi op elektroneschem Wee gesicht, andeems duerch Hacken an d'Informatikssystemer probéiert gëtt, Informatiounen ze kréien oder ofzelauschterern.

A Krisenzäite kënne Spiounen och dozou agesat ginn, bestëmmte strategesch Saachen ze klauen oder, duerch Sabotage, ze zestéieren. Konter-Spionage besteet dodran, Spionageugrëffer ze erkennen an ze neutraliséieren, oder duerch d'Weidergi vu Falschinformatiounen ze irelevant ze maachen.

Bal all Land huet streng Gesetzer géint Spionage[1], mee de Virdeel, deen ee doduerch kann hunn, ass grouss genuch datt se de Risiko wäert ass.

Referenzen[Quelltext änneren]

  1. De Lëtzsebuerger Code Pénal gesäit dofir z.B. liewenslängleche Prisong vir (Art. 116 ss.)