Kuelenhydrat

Dëse Chimiesartikel ass eréischt just eng Skizz. Wann der méi iwwer dëst Thema wësst, sidd der häerzlech invitéiert, aus dëse puer Sätz e richtegen Artikel ze schreiwen. Wann der Hëllef braucht beim Schreiwen, da luusst bis an d'FAQ eran.

Kuelenhydrater oder Glucidë sinn organesch Molekülen, déi bal ausschléisslech aus Kuelestoff (C), Waasserstoff (H) a Sauerstoff (O) bestinn. Eng Rëtsch Kuelenhydrater hunn e séisse Goût, dofir gi s'och nach Zockere genannt.

Chemesch gesinn handelt et sech ëm Polyhydroxyaldehyden (Aldosen, HOCH₂-(CHOH)_n-CHO) an Polyhydroxyketonen (Ketosen, HOCH₂-(CHOH)_n'-CO-CH₂OH) esouwéi ëm Oligomer a Polymerer vun dësen. Esou kënnt et datt ee Monosacchariden, Oligosacchariden a Polysacchariden ënnerscheet.

Chimie vun de Kuelenhydrater

Monosacchariden

• mat 5 C-Atomer
  • Ribos
• mat 6 C-Atomer
  • Glukos
  • Fruktos

Oligosacchariden

• Disacchariden
  • Saccharos
  • Laktos

Polysacchariden

• Homopolymeren
  • Cellulos
  • Glykogen
• Heteropolymeren
  • Chitin

Kuelenhydrater an der Ernierung

Kuelenhydrater sinn nieft de Lipiden an de Proteinnen di wichtegst Nierstoffer vum Mënsch. Si ginn aus dem Kuelestoff, Waasser- a Sauerstoff duerch Photosynthes, an de Planze mat Hëllef vu Sonnenenergie a Chlorophyll gebilt.

Zu de Kuelenhydrater zielen all d'Zocker- a Steifaarten genee esou wéi bal all d'Balaststoffer. Déi deeglech Energiezoufuhr soll tëscht 50 a 60% aus Kuelenhydrate bestoen, läit awer an den Industrielänner nëmme bei 40 - 45%. De gréissten Deel vun dëser Energiezoufuhr soll aus stäerkt- a ballaststoffräicher Narung bestoen. Dëst sinn z. B. Geméis, Uebst a Käreprodukter, well si ausserdeem och nach vill Vitaminnen a Mineralstoffer hunn.

Liewensmëttel déi haaptsächlech aus Haushaltszocker oder wäisse Mielprodukter bestinn, solle wa méiglech gemidde ginn. Si hu praktesch keng Vitaminnen, Ballaststoffer oder Mineralstoffer.

Fir de Kierper si s'an éischter Linn Energieliwweranten. Si kommen awer och an de Schanken an am Bindegewief vir, an dat a Form vu Schläimstoffer am mënschlechen Organismus.

D'Opsplécke vun der Steif fänkt schonn am Mond un. D'Haaptverdauung ass awer eréischt am Daarm.

D'Opnahm vu Kuelenhydrater erhéicht kuerzfristeg de Bluttzockerspigel, woubäi awer en Ënnerscheed besteet, deemno wat fir en Zocker et sinn. D'Glukos an d'Galaktos ginn zum Beispill ganz séier vum Dënndaarm opgeholl, esou, datt de Bluttzockerspigel ganz séier an d'Luucht geet, bei der Fruktos ass awer genee de Géigendeel de Fall.

De Bluttzockerspigel geet op säin Ausgangsniveau zréck soubal d'Kierperzellen d'Glukos opgeholl hunn.

Um Spaweck

Commons: Kuelenhydrater – Biller, Videoen oder Audiodateien