Dominique Pescatore
| Dominique Pescatore | |
|---|---|
| Gebuer | 28. Januar 1758 |
| Gestuerwen | 9. September 1810 |
| Nationalitéit | Lëtzebuerg |
| Aktivitéit | Affekot |
| Famill | |
| Kanner | Antoine Pescatore, Ferdinand Pescatore |
 | |
Den Dominique-Marie Pescatore, gebuer den 28. Januar 1758 zu Lëtzebuerg, an och do gestuerwen den 9. September 1810, war e lëtzebuergesche Geschäftsmann a Jurist.
Hie krut seng Agregatioun als Affekot den 23. August 1783 vum Conseil provincial. De 27. August 1786 huet hien d'Marie-Madelaine Geschwind bestuet, d'Duechter vum Raymond Geschwind, engem éisträicheschen Ënneroffizéier.
Dem Dominique Pescatore seng Geschäfter sinn net sou brillant gelaf. Am Ufank war hien de Besëtzer vun der Steeseler Millen, an hie konnt och nach d'Mille vu Schëtter kafen. Duerno ass et awer lues a lues biergof gaange mam Geschäft, a wéinst sengem net-standesgeméisse Bestietnes gouf hien net vun der Famill ënnerstëtzt. Nom Doud vu senger Fra, den 21. Oktober 1807, si seng Geschäfter praktesch net méi gelaf soudatt en zum Schluss nach just en Tubaksbuttek hat.
Den 9. September 1810 gouf hie bei der Bouneweger Klouschtermillen dout an der Uelzecht fonnt.
Aus sengem Bestietnes mat der Marie-Madelaine Geschwind, hat hie sechs Kanner: zwee Meedercher a véier Bouwen, déi an der drëtter Generatioun vun de Pescatoren zu Lëtzebuerg der Famill zu hirer Bekanntheet verhollef hunn.
Et waren dat:
- Den Antoine Pescatore,
- de Ferdinand Pescatore
- de Jean-Pierre Pescatore an
- de Guillaume Pescatore
Den Dominique war de Brudder vum Joseph-Antoine Pescatore.