Eech zu Lenneng

Vu Wikipedia
Op d'Navigatioun wiesselen Op d'Siche wiesselen
Déi bemierkenswäert Eech zu Lenneng.
E gewaltege Stamm.

D'Eech zu Lenneng steet um Rand vum Branebësch am Südweste vu Lenneng. Si ass op der topographescher Kaart (23 Grevenmacher) als Eech agedroen. Aus de Quelle geet net ervir ob et eng Summer- oder Wantereech ass.

D'Eech fënnt een, wann een zu Lenneng d'Strooss fir op Greiweldeng eropfiert, op der Kräizung uewen um Plateau an de goudronnéierte Feldwee no riechts ofbéit, zirka 100 m duerno no lénks fiert, sech weider riets hält, fir dann do, wou d'Wéngerte vu Greiweldeng ufänken, deen net goudronnéierte Wee riets erop a Richtung Bësch geet, wou dann de Bam scho vu wäitem z'erkennen ass.

Dës Eech gehéiert wéinst hirem Alter, deen op iwwer 200 Joer geschat gëtt, an hirer imposanter Erscheinung zu de bemierkenswäerte Beem zu Lëtzebuerg.

Schonn ëm 2000 war d'Eech net méi an engem gesonden Zoustand. Nodeem si e puer vun hiren décken Äscht verluer hat, huet Mëtt der 90er Jore vum leschte Joerhonnert e Stuerm hir en Haaptaascht ewechgebrach. 2008 kann ee gesinn, datt op der Bëschsäit d'Schuel, wahrscheinlech duerch e Blëtzschlag, op grousser Längt ofgestuerwen ass, an d'Holz do am Gaang ass sech ze zersetzen.

D'Spezialiste recommandéieren, de Bam net ze restauréieren, hie sech also selwer z'iwwerloossen bis en ofstierft, wat sécherlech nach Joerzéngte wäert daueren. Op der Plaz wou e steet stellt e keng Gefor fir Mënschen duer, an Holz, dat ofstierft bitt villen Déieren, z. B. de Spiechten a virun allem villen Insekten e wichtege Liewensraum.

Folgend Moosse goufe geholl. Stammdéckt op Broschthéicht:

  • 1980: 3,70 m;
  • ëm 2000: 4,92 m, bei enger Gréisst vun 21 m.

Domat ass dëse Bam déi 30déckst Eech zu Lëtzebuerg.

Geographesch Koordinaten: 49° 35’ 36.12’’ N 06° 21’ 10.27’’ O

Quellen[änneren | Quelltext änneren]

  • Sinner, J. et al., 2002. Les arbres remarquables. Administration des eaux et forêts. Musée national d'histoire naturelle. 255 S. (Cf. S. 44-45, Text a Foto).
  • Administration des eaux et forêts, 1981. Arbres remarquables du Grand-Duché de Luxembourg. Imprimerie Saint-Paul, 167 S. (Cf. Tabell S. 47, keng Beschreiwung a keng Foto vun der Eech dran).

Kuckt och[änneren | Quelltext änneren]

Fotoalbum[änneren | Quelltext änneren]

|

Vue a Richtung Lenneng, vun der Eech aus gesinn.