Europäesche Wirtschafts- a Sozialcomité

Vu Wikipedia
Wiesselen op: Navigatioun, sichen
Disambig.svg Dësen Artikel beschäftegt sech mat europäesche Wirtschafts-a Sozialcomité. Fir dee lëtzebuergeschen, kuckt w.e.g. Conseil économique et social (Lëtzebuerg).
Sëtz vum EWSC, am Jacques-Delors-Gebai zu Bréissel.

Den Europäesche Wirtschafts- und Sozialcomité (EWSC; EWSA op Däitsch; CESE op Franséisch) huet eng berodend Funktioun an der Europäescher Unioun. E gouf 1957 duerch d'Traitéë vu Roum geschaaft. An him si Patronat, Gewerkschaften, Baueren, Konsumenten, an aner Interessegruppe vertrueden, déi zesummen déi "organiséiert Biergerschaft" forméieren.

Déi genee Zesummesetzung, d'Organisatioun an d'Aufgabe vum EWSC sinn an den Artikelen 257 bis 262 vum Traité iwwer d'Europäesch Communautéit geregelt.

Memberen[änneren | Quelltext änneren]

Den EWSC huet 350 Memberen, déi sech, jee no hirer Gréisst, op d'Memberstaate vun der EU verdeelen.

D'Membere ginn zwar vun de Regierungen vun de Memberslänner proposéiert, mä sinn an hirer Aarbecht komplett onofhängeg. Si ginn op véier Joer ernannt, a kënnen eng zweet Kéier erëmernannt ginn.

Déi 5 Lëtzebuerger Membere sinn (Stand: Mee 2018): Raymond Hencks, Norbert Geisen, Jean-Claude Reding, Christophe Hansen a Josiane Wilmes.

Aufgaben[änneren | Quelltext änneren]

Den EWSC huet just eng Beroder-Funktioun, kann also keng Decisiounen huelen, déi definitiv wieren. Hie muss awer consultéiert ginn, wann et ëm Gesetzesprojete geet, déi d'Wirtschafts- oder Sozialpolitik vun der EU uginn. Zanter dem Traité vu Maastricht sinn d'Gebidder ausgespreet ginn op Ëmwelt, Erzéiung, Konsumenteschutz, Gesondheet, indirekt Besteierung, transeuropäesch Réseauën a Strukturfongen. Sou gëtt hien Avisen of bei Propositiounen, déi d'Europäesch Kommissioun dem Europäesche Parlament an dem Conseil vun der Europäescher Unioun mécht. A politesche Gespréicher mat der Kommissioun, dem Parlament oder dem Rot vertrëtt den EWSC d'Interessen an d'Positioune vu senge Memberen.

De Comité kënnt an enger Vollversammlung zesummen. D'Avisen, déi do ugeholl ginn, ginn a 6 Ënnercomitéën (oder "Fachgruppen") virbereet, déi thematesch organiséiert sinn. All 2 Joer ginn aus senger Mëtt e President an 2 Vizepresidente gewielt.

Den EWSC huet säi Sëtz zu Bréissel.

Kuckt och[änneren | Quelltext änneren]

Um Spaweck[änneren | Quelltext änneren]

Flag of Europe.svg Portal EU – All d'Artikelen op der Wikipedia iwwer d'Europäesch Unioun.