Ferrara

Ferrara
Ferrara
Land	Italien
Regioun	Emilia-Romagna
Provënz	Ferrara
Koordinaten	44°50'7,069"N, 11°37'11,514"O
Fläch	405,16 km²
Awunner	129.340 (1. Januar 2023)
Héicht	9 m
ISTAT	038008

Ferrara ass eng italieenesch Stad mat 133.266 Awunner (2007), déi am Po-Flaachland läit. Ferrara ass bekannt duerch seng vill schéi Gebaier aus der Renaissance-Zäit (z. B. d'Kathedral San Giorgio an de Palazzo Giulio d'Este). D'Stad Ferrara an de Po-Delta si vun der UNESCO op d'Lëscht vum Weltierwe gesat ginn (1995, 1999).

Geschicht

Ferrara ass warscheinlech als Siidlung duerch d'Awunner vun de Lagunen ëm d'Po-Mëndung gegrënnt ginn. Si gouf fir d'éischt an engem Dokument vum Aistulf vu 753 oder 754 ernimmt a war een Deel vum Exarchat Ravenna. No 984 gouf si verwalt vum Tedalda, Grof vu Modena a Canossa, engem Neveu vum Keeser Otto I. Duerno gouf Ferrara selbständig, an 1101, no enger Belagerung, vun der Markgräfin Matilda eruewert. Zu där Zäit gouf d'Stad vun engem Grupp vu bedeitende Famillen dominéiert, dorënner och d'Adelardiën. Wéi de Guglielmo, de leschte vun den Adelardiën, gestuerwen ass goung säi Besëtz un den Azzolino d'Este iwwer. Vun do un hat d'Famill d'Este zu Ferrara d'Soen. Zu Ferrara erënnert villes u si.

1391 gouf d'Universitéit vu Ferrara gegrënnt. De Niccolò III. (1393-1441) huet puer Peepst mat groussem Pomp zu Ferrara empfaangen, ganz besonnësch den Eugen IV., deen do 1438 ee Konzil ofgehalen huet.

Ercole I. (1471-1505) huet e Krich géint Venedeg gefouert. Säi Fils Alfonso I. huet sech mam Lucretia Borgia bestuet an huet de Krich géint Venedeg mat Erfolleg virugefouert. 1509 gouf hie vum Poopst Julius II. exkommunizéiert an huet dunn och géint déi peepstlech Arméien Krich gefouert. Mat de Peepst, déi duerno koumen, huet den Alfonso Fridde geschloss. Säin Enkel, Alfonso II, gouf mam Barbara, enger Sëschter vum Keeser Maximilian II., bestuet. Ënner him huet Ferrara seng Glanzzäit erlieft. Villes ass vun der Este-Famill fir d'Konscht gemaach ginn. Well den Alfonso II. kee männlechen Ierwen hat, huet de Poopst Clemens III. Usproch op Ferrara erhuef. D'Stad ass dunn en Deel vum Kierchestat bliwwe bis et an d'Kinnekräich Italien integréiert gouf.

Kuckeswäertes

d'Kathedral San Giorgio
de Palazzo Giulio d'Este
den Diamantepalais
déi 9 Km laang Stadmaueren

Literatur

Birgit Emich: Territoriale Integration in der Frühen Neuzeit. Ferrara und der Kirchenstaat, Köln/Weimar/Wien: Böhlau 2005, 1178 S. ISBN 3-412-12705-1 (Habilitatioun Freiburg 2002)

Bekannt Perséinlechkeete vu Ferrara

Alfonso I. d'Este, Herzog vu Ferrara, Modena a Reggio Emilia
Michelangelo Antonioni, italieenesche Filmregisseur, Auteur a Moler
Lorenzo Costa, italieenesche Moler
Francesco del Cossa, italieenesche Moler
Ercole I. d'Este, Herzog vu Ferrara, Modena an Reggio Emilia
Ercole II. d'Este, Herzog vu Ferrara, Modena an Reggio Emilia
Ippolito I. d'Este, Äerzbëschof a Kardinol
Ippolito II. d'Este, Äerzbëschof vu Mailand a Kardinol
Isabella d'Este, eng vun de wichtegste Persounen an der Kultur a Politik vun der italieenescher Renaissance
Giorgio Bassani, italieenesche Schrëftsteller an Dichter

Kuckt och

Lëscht vun de Weltierwen

Um Spaweck

Offiziell Säit vun der Stad Ferrara (it)
UNESCO-Lëscht vun de Weltierwen (fr)

Commons: Ferrara – Biller, Videoen oder Audiodateien