Multimodalplattform Beetebuerg

Geographesch Koordinaten:

49° 30’ 03,4’’ N 6° 05’ 58,1’’ E

D'Multimodalplattform Beetebuerg am Süde vun der Beetebuerger Gare ass eng Infrastruktur fir Container vun Zich op Camionen (an ëmgedréint), a Camionen op Zich a vun Zich erof ze lueden. Si gëtt vun der Logistikgesellschaft CFL Multimodal bedriwwen, enger Duechtergesellschaft vun den CFL. Vun 2014 un gouf eng Extensioun gebaut déi 2017 a Betrib geholl gouf. Se gouf de 7. Juli offiziell opgemaach.

D'Plattform ass 33 ha grouss a besteet ë. a. aus 4 Gleiser vu 700 m Längt, iwwer déi Bréckekrane mat engem Gewiicht vun 380 t an enger Héicht vun 20 m ewechfueren, fir bis zu 300.000 Container am Joer ëmzetässelen, an zwee weider Gleiser vu 700 m Längt, wou bis zu 300.000 Camionen d'Joer op Zich erop- an eroffuere kënnen, déi dann iwwer d'Eisebunn doruechter gefouert kënne ginn.