Zaldotekierfecht vun Hotton

Vu Wikipedia
Op d'Navigatioun wiesselen Op d'Siche wiesselen
Geographesch Koordinaten:
Den Zaldotkierfecht am Abrëll 2011

Den Zaldotekierfecht vun Hotton bei Marche an der belscher Provënz Lëtzebuerg ass e Militärkierfecht, op deem Zaldoten aus dem Zweete Weltkrich aus de Commonwealth-Länner begruewe leien.

Déi meescht Griewer um Kierfecht stamen aus der Period vun der Ardennenoffensiv am Januar 1945. En etlecher si vun Zaldoten, déi zum Briteschen Expeditiounskorps gehéiert hunn an déi am Mee 1940 op de belsche Verdeedegungslinne gefall sinn.

Wéi bei de meeschte Commonwealthkierfechter steet an der Entrée e grousst Afferkräiz aus wäissem Steen op deem e Kruzifix aus Bronze festgemaach ass. Riets a lénks vum Kräiz stinn zwéi kleng véiereckeg Pavillonen, op deenen hirer viischter Säit eng stenge Plack ass, an op deenen e Remerciement agravéiert ass, fir dem belsche Vollek Merci ze soen, well et déi Plaz zur Verfügung gestallt huet, um lénksen op Franséisch an um rietsen op Hollännesch.

Um Kierfecht gëtt et 668 Griewer, dovu 666 vu Commonwealth-Zaldoten, wouvun der 21 net identifizéiert sinn. Et gëtt zwee Griewer vun Zaldoten, déi op der Säit vun de Commonwealthtruppe gekämpft hunn an zwar e Belsch an e polnesche Läitnant. Eng Plack erënnert un d'Pilote vum Fligercrash op der Maulesmillen, déi net zu Hotton begruewe goufen, mä deenen hir Griewer op där Plaz am Bësch sinn, wou och d'Reschter vum erofgefalene Fliger leien.

Op enger Plack mat enger Landkaart, an der Entrée vum Kierfecht, ginn d'Truppebewegunge vun den Alliéierte beschriwwen.