Abrëllsblumm

Dëse Biologiesartikel ass eréischt just eng Skizz. Wann der méi iwwer dëst Thema wësst, sidd der häerzlech invitéiert, aus dëse puer Sätz e richtegen Artikel ze schreiwen. Wann der Hëllef braucht beim Schreiwen, da luusst bis an d'FAQ eran.

D' Abrëllsblumm (Anemone nemorosa) ass eng Planz aus der Gattung Anemone, déi zu der Famill vun de Botterblummen (Ranunculaceae) gehéiert.

De wëssenschaftlechen Numm setzt sech zesummen aus dem griichesche Wuert anemos = "Wand" an dem laténgeschen nemorosa/-us = "am Schiet".

Dem Henri Klees no huet si nach folgend Nimm: Bloderblumm, Bëschblumm, Hefflerblumm, Holzblumm, Kéisblimmchen, Këschteblumm, Läffelsblumm, Mäerzblumm, Ouschterbléi.

D'Blumm ass an Europa an den hiwwelege Géigenden, an an de Bierger, an de Bëscher an op Wisen ze fannen.

D'Planz déi e puer Joer hannereneen erëmkënnt, gëtt tëschent 10 a 25 cm grouss a blitt tëschent Mäerz an Abrëll/Mee. De Som gëtt vu Seechomesse verspreet. Hir Blieder sinn tëscht 5 an 12 cm laang, mëttelgréng, mat dräi afgerënnte Wutzen, a mat klengen Zänn laanscht d'Säiten. Se huet eng wäiss eenzel Bléi mat 6 - 8 Bléieblieder, déi tëscht 2 an 3 cm grouss ass, déi heiansdo och liicht rosa ka sinn.

Si huet e flaacht Wuerzelwierk, dat sech wäit ëm d'Planz ausbreet. D'Planz, déi Protoanemonin enthält, ass gëfteg.

D'Abrëllsblumm nieft dem Däiwelsbaart op enger Lithographie am Gëftplanzebuch vum Mathias Kraus

Literatur

• Klees, Henri, 1994. Luxemburger Pflanzennamen. Beiträge zur luxemburgischen Sprach- und Volkskunde Nr. VIII. 3. Aufl., 182 S., Pierre Linden, Luxemburg.
• Kraus, Mathias, 1887. Die einheimischen Giftpflanzen / mit naturgetreuen Abbildungen auf 21 colorirten Tafeln aus der litographischen [sic] Anstalt von J. F. Schreiber in Esslingen. 104 S. Verlag von J. Erpelding, Luxemburg.

Kuckt och

• Lëscht vu lëtzebuergesche Planzennimm

Notten

Commons: Anemone nemorosa – Biller, Videoen oder Audiodateien