Amerika (Kontinent)

Amerika (Kontinent)
Geographie
Besteet aus	Südamerika, Nordamerika, Zentralamerika
Länner	35
Fläch	42.549.000 km²
Héchste Punkt	Aconcagua (6.962 m)
Déifste Punkt	Laguna del Carbón (-105 m)
Demographie
Awunner	1.055.385.441 (2025)
Bevëlkerungsdicht	Südamerika 24,56/km² Nordamerika 25,46/km²
Aner Informatiounen
Entdeckt	12. Oktober 1492 (julianesch)
Entdeckt vun	Christoph Kolumbus, onbekannt
Genannt no	Amerigo Vespucci
Kaart vun Amerika (CIA)

Amerika ass en Duebelkontinent, deen aus den zwéi Kontinenter Nordamerika a Südamerika besteet, déi duerch d'Mëttelamerika an d'Karibik matenee verbonne sinn. En zitt sech vum Nordpol bis bal un d'Antarktis.

Den Duebelkontinent huet eng total Fläch vun ongeféier 42,55 Millioune Quadratkilometer. Op deenen zwéi Kontinenter liewe méi wéi 1,055 Milliard Mënschen.

Geographie

Amerika erstreckt sech iwwer bal 43 Millioune km², wat engen 28 % Festland vun der Äerduewerfläch entsprécht. Den amerikanesche Kontinent läit tëscht dem Arkteschen Ozean am Norden, dem Atlantik am Osten, dem Pazifik am Westen an der Antarktis am Süden.

De Kontinent ass duerch eng grouss geologesch a klimatesch Diversitéit gepräägt. Vum Permafrost an der Arktis bis zu tropesche Reebëscher am Amazonasgebitt ass bal all Klima vertrueden.

Gewässer

Amerika besëtzt bedeitend Waasserressourcen:

• Amazonas: de längste Floss a Südamerika an de waasserräichste Floss weltwäit;
• Mississippi-Missouri-System: gréisste Flosssystem an Nordamerika;
• Grouss Séien: eng Grupp vu fënnef grousse Séien tëscht Kanada an den USA;
• Karibescht Mier: wichtegt maritimt Gebitt fir den Tourismus an d'Biodiversitéit;
• strateegesch Waasserstroosse fir den interkontinentale Verkéier, ë. a.:
  • Panamakanal, tëscht dem Atlantik an dem Pazifik;
  • St. Lawrence River, tëscht dem Ontarioséi an dem Atlantik.

Bierger

Déi markantst Biergketten um Kontinent sinn:

• Rocky Mountains (Nordamerika);
• Appalachen (Nordamerika, Oste vun den USA);
• Anden, déi längst Biergketten op der Welt, déi sech duerch dat ganzt westlecht Südamerika zitt;
• Cordillera Central a Mëttelamerika.

Geschicht

Amerika war ursprénglech vun enger grousser Villfalt vun indigeene Kulture bewunnt. Déi éischt europäesch Kolonisatioun huet am 15. Joerhonnert mat de Reese vum Christoph Kolumbus ugefaangen. Am Laf vun der Zäit hu verschidde Kolonialmuechten – besonnesch Spuenien, Portugal, Frankräich an England – Deeler vum Kontinent ënner sech opgedeelt. Dëst huet zu grousse Verännerungen an der Demographie, der Politik an der Kultur gefouert. Am 18. a 19. Joerhonnert hunn déi meescht amerikanesch Länner hir Onofhängegkeet erkläert.

„Entdeckung“ vun Amerika

Obwuel bekannt ass, datt ëm d'Joer 1000 de Leif Eriksson als éischten Europäer nordamerikanesche Buedem betratt huet, gëtt de Christoph Kolumbus als eigentlechen Entdecker betruecht (1492). Den Giovanni Caboto huet 1497 als éischten Europäer amerikanescht Festland betratt. 1507 erkennt den Amerigo Vespucci als éischten Amerika als e Kontinent. Et gëtt och Unzeechen, datt onbekannt Islänner schonn am Joer 985 Nordamerika erreecht hätten.

Bevëlkerung a Sproochen

Amerika huet ongeféier 1,055 Milliarden Awunner an d'Sproocheverdeelung reflektéiert d'kolonial Geschicht:

• Spuenesch ass déi meescht geschwat Sprooch a Latäinamerika;
• Englesch dominéiert an Nordamerika an a villen Karibikstaaten;
• Portugisesch ass d'Haaptsprooch a Brasilien;
• do dernieft gëtt et Honnerte vun indigeene Sproochen, wéi Quechua (Peru, Bolivien), Guarani (Paraguay) oder Nahuatl (Mexiko).

Politik

D'politesch Systemer variéiere vun demokratesche Republicken (z. B. Kanada, Chile) bis zu méi instabille Regimmer wéi a Venezuela.

Déi gréisst international Kooperatiounsplattforme sinn:

• Organisatioun vun Amerikanesche Staaten (OAS) déi Demokratie, Sécherheet a Mënscherechter promouvéiert;
• Mercosur: eng wirtschaftlech Allianz a Südamerika (z. B. Brasilien, Argentinien);
• Karibesch Gemeinschaft (CariCom): eng Kooperatioun tëscht de Karibikstaaten.

Ekonomie

Amerika ass wirtschaftlech heterogen: vun héich entwéckelte Staaten (USA, Kanada) bis zu Länner mat méi schwaacher Infrastruktur. D'USA si mat engem Bruttoinlandsprodukt vun 29,18 Milliarden USD (2024) déi gréisst Wirtschaftsnatioun op der Welt.

Tourismus

Tourismus spillt an alle Regiounen eng grouss Roll, absënns:

• Nordamerika: Grand Canyon, Niagara-Waasserfäll, New York, Banff-Nationalpark, …
• Nationalpark Karibik: Plagen op Jamaika, der Dominikanescher Republik, de Bahamas, …
• Mëttelamerika: Maya-Ruinen (z. B. Tikal, Copán), Vulkaner, Costa Rica mat sengen Nationalparken, …
• Südamerika: Machu Picchu, Rio de Janeiro, Patagonien, Galápagosinselen, …

Haaptexportartikel

D'Haaptexportartikelen no Regioun begräifen:

• Nordamerika: Technologie, Automobilindustrie, Réimaterial (Äerdueleg, Koffer, Eisenäerz), Industrie- an Agrarprodukter (USA, Kanada);
• Karibik: Bauxit, Rum, …
• Mëttelamerika: Kaffi, Banannen, Zockerrouer, …
• Südamerika: Soja (Brasilien, Argentinien), Koffer (Chile), Ueleg (Venezuela), Lithium (Bolivien, Argentinien).

Opdeelung

Geographesch Opdeelung

Amerika gëtt traditionell a follgend grouss Regiounen opgedeelt:

• Nordamerika: USA, Kanada, Mexiko;
• Mëttelamerika: vu Mexiko bis Panama;
• Karibik;
• Südamerika: 12 souverän Staaten, inkl. Brasilien, Argentinien a Kolumbien.

Alternativ gëtt et och eng Opdeelung op der Basis vun der Sprooch an der Kultur an Angloamerika (engleschsproocheg Regiounen) a Latäinamerika (romanesch Sproochen).

Länner

Zum amerikanesche Kontinent gehéieren:

• 35 Memberstaate vun de Vereenten Natiounen,
• 6 Gebidder vun net-amerikanesche Staaten,
• 18 Territoiren déi vun enger anerer Natiounen ofhängeg sinn.

Membere vun de Vereenten Natiounen

Nr	Staat oder Territoire	Offizielle Staatsnumm	Haaptstad	Fläch [km²]	Awunner
1	Antigua a Barbuda	Antigua a Barbuda	Saint John's	441	93.772
2	Argentinien	Argentinesch Republik	Buenos Aires	2.780.400	45.696.159
3	Bahamas	Bahamas	Nassau	13.880	401.283
4	Barbados	Barbados	Bridgetown	430	282.467
5	Belize	Belize	Belmopan	22.996	417.072
6	Bolivien	Plurinationale Staat Bolivien	Sucre (de jure) La Paz (de facto)	1.098.581	12.413.315
7	Brasilien	Federativ Republik Brasilien	Brasília	8.515.770	211.998.573
8	Chile	Republik Chile	Santiago de Chile	756.102	19.764.771
9	Costa Rica	Republik Costa Rica	San José	51.100	5.129.910
10	Dominica	Commonwealth Dominica	Roseau	751	66.205
11	Dominikanesch Republik	Dominikanesch Republik	Santo Domingo	48.670	11.427.557
12	Ecuador	Republik Ecuador	Quito	283.561	18.135.478
13	El Salvador	Republik El Salvador	San Salvador	21.041	6.338.193
14	Grenada	Grenada	St. George's	344	117.207
15	Guatemala	Republik Guatemala	Guatemala-Stad	108.889	18.406.359
16	Guyana	Kooperativ Republik Guyana	Georgetown	214.969	831.087
17	Haiti	Republik Haiti	Port-au-Prince	27.750	11.772.557
18	Honduras	Republik Honduras	Tegucigalpa	112.090	10.825.703
19	Jamaika	Jamaika	Kingston	10.991	2.839.175
20	Kanada	Kanada	Ottawa	9.984.670	39.742.430
21	Kolumbien	Republik Kolumbien	Bogotá	1.138.910	52.886.363
22	Kuba	Republik Kuba	Havanna	110.860	10.979.783
23	Mexiko	Vereenegt Mexikanesch Staaten	Mexiko-Stad	1.964.375	130.861.007
24	Nicaragua	Republik Nicaragua	Managua	130.370	6.916.140
25	Panama	Republik Panama	Panama-Stad	75.420	4.515.577
26	Paraguay	Republik Paraguay	Asunción	406.752	6.929.153
27	Peru	Republik Peru	Lima	1.285.216	34.217.848
28	Saint Kitts an Nevis	Federatioun Saint Kitts an Nevis	Basseterre	261	46.843
29	Saint Lucia	Saint Lucia	Castries	616	200.000
30	Saint Vincent an d'Grenadinnen	Saint Vincent an d'Grenadinnen	Kingstown	389	100.616
31	Surinam	Republik Surinam	Paramaribo	163.820	634.431
32	Trinidad an Tobago	Republik Trinidad an Tobago	Port of Spain	5.128	1.507.782
33	Uruguay	Republik ëstlech vum Uruguay	Montevideo	176.215	3.386.588
34	USA	Vereenegt Staate vun Amerika	Washington, D.C.	9.833.517	345.426.571
35	Venezuela	Bolivaresch Republik Venezuela	Caracas	912.050	28.405.543

Gebidder vun net-amerikanesche Staaten

Nr	Territoire	Mammeland	Haaptstad	Fläch [km²]	Awunner
1	Bonaire	Holland	Kralendijk	294
2	Guyane	Frankräich	Cayenne	84.000	310.000
3	Guadeloupe	Frankräich	Basse-Terre	1.628	380.000
4	Martinique	Frankräich	Fort-de-France	1.128	340.000
5	Saba	Holland	The Bottom	13
6	Sint Eustatius	Holland	Oranjestad	21

Ofhängeg Gebidder

Nr	Territoire	Mammeland	Haaptstad	Fläch [km²]	Awunner
1	Amerikanesch Joffereninselen	USA	Charlotte Amalie	347	80.000
2	Anguilla	Vereenegt Kinnekräich	The Valley	91	10.000
3	Aruba	Holland	Oranjestad	180	110.000
4	Bermuda	Vereenegt Kinnekräich	Hamilton	54	60.000
5	Brittesch Joffereninselen	Vereenegt Kinnekräich	Road Town	151	40.000
6	Kaimaninselen	Vereenegt Kinnekräich	George Town	246	70.000
7	Curaçao	Holland	Willemstad	444	190.000
8	Falkland Inselen	Vereenegt Kinnekräich	Stanley	12.173
9	Grönland	Dänemark	Nuuk	2.166.086	60.000
10	Guantanamo Bay Naval Base	USA	–
11	Montserrat	Vereenegt Kinnekräich	Plymouth	103
12	Puerto Rico	USA	San Juan	9.100	3.240.000
13	Saint-Barthélemy	Frankräich	Gustavia	22	10.000
14	Saint-Martin	Frankräich	Marigot	53	30.000
15	Saint-Pierre a Miquelon	Frankräich	Saint-Pierre	242	10.000
16	Sint Maarten	Holland	Philipsburg	34	40.000
17	Südgeorgien an d'Südlech Sandwichinselen	Vereenegt Kinnekräich	King Edward Point	3.903
18	Turks- a Caicosinselen	Vereenegt Kinnekräich	Cockburn Town	948	50.000

Quellen

• (en) World Population Prospects 2024
• (en) World Bank. "GDP by Country and Region 2024"
• (en) International Trade Centre. "Trade Map – Americas Export Profile 2023"
• (en) UNWTO. "Tourism Highlights – Americas". https://www.unwto.org
• (en) Ethnologue. "Languages of the World – Americas". https://www.ethnologue.com
• (en) OAS Offiziell Internetsäit
• (en) Mercosur Official Portal

Um Spaweck

Commons: Amerika (Kontinent) – Biller, Videoen oder Audiodateien