Chet Baker

Chet Baker
Chet Baker
Pseudonym	Chet
Gebuer	23. Dezember 1929
Gestuerwen	13. Mee 1988; Amsterdam
Doudesursaach	Fall
Nationalitéit	USA
Educatioun	El Camino College
Aktivitéit	Sänger, Trompettist, Komponist, Jazzmuseker

Den Chet Baker, gebuer als Chesney Henry Baker Jr. den 23. Dezember 1929 zu Yale am Oklahoma, a gestuerwen den 13. Mee 1988 zu Amsterdam, war en US-amerikaneschen Jazzmuseker (Trompettist, Bügelhornspiller, Sänger a Komponist).

Am Alter vun 10 Joer krut e vun sengem Papp, deen e grousse Bewonnerer vum Jack Teagarden war, eng Trombonn. De jonken Chet, begeeschtert vum Harry James, tauscht se a géint eng Trompett. Fir d'éischt spillt hien am Schoulorchester, da bei oppenen Danzconcerten. 1946 mellt e sech an d'Arméi an e flitt mat der 298ster Army Band op Berlin. 1948 gëtt en ausgemustert an hie studéiert Harmonie; owes spillt en a Nightclubs. Eng entäuschte Léift féiert de Baker 1950 erëm an d'Arméi. Ee Joer drop gëtt hien op Arizona stroofversat, an duerno aus "psychiatresche" Grënn an d'Zivilliewen zeréckgestallt. 1952 ass hien zu Los Angeles a spillt no an no mat villen Jazzgréissten: mat dem Stan Getz, dem Charlie Parker, dann am Quartett vum Gerry Mulligan. Am Fréijoer 1953 geet hie beim Mulligan fort an e grënnt e Quartett. Op villen Plakke vun där Grupp ass de Baker als Sänger ze héieren. Am Hierscht 1955 ass hie mat sengem eegene Quartett oder Quintett ëmmer méi dacks op europäesche Bünen ze fannen.

1959 gëtt de Baker zu Harlem wéinst Droge festgeholl an op Rikers Island an de Prisong gestach. De Bil Grauer vun der Plakke-Firma Riverside bezillt d'Kautioun a sou fanne mer den Chet Baker vun 1959 bis 1964 an Europa erëm. Zu Paräis kritt hie seng Trompett geklaut; sou kënnt en zum Bügelhorn. 1964 gëtt e fir d'zweet Kéier an Däitschland wéinst Drogenaffäre verhaft an dann iwwer d'Grenz gesat.

Bis 1968 schléit hie sech zu Los Angeles méi schlecht wéi recht duerch; hie wëllt, mat Hëllef vu Methadon, vum Heroin ewegkommen. Zu San Francisco gëtt hie vun Dealer geschloen; hie kritt dat ennescht Gebéck gebrach an hie verléiert dobäi e puer Zänn. Dräi Joer laang schafft en all Dag 16 Stonnen op enger Bensinnspompel. Hie léiert lues a lues erëm Bügelhorn. Den Dizzy Gillespie hëlleft him hannescht op d'Bün.

Fir laanscht d'Drogen ze kommen, reest en erëm an Europa. Da kommen e puer Joer mat vill Hin an Hier, ville Musekpartner a ganz ville Plakkenopnamen.

Den 13. Mee 1988 fält den Chet Baker aus net geklärte Grënn (d'Zeitunge schreiwe vun Drogendealer) zu Amsterdam aus der Fënster vun engem Hotel. Hien ass direkt dout.

Den Chet Baker staamt musikalesch vum Miles Davis of. Seelen huet en Trompettist d'Gefill vum Elengsinn an der Trauer sou ergräifend mat engem Blosinstrument ausgedréckt.

Dokumentarfilm

Let's Get Lost (1988), Regie Bruce Weber: Interviewë mam Chet Baker, Membere vu senger Famill an Jazzmuseker.

Um Spaweck

Commons: Chet Baker – Biller, Videoen oder Audiodateien