Deutsch-Luxemburgisches Schengen-Lyzeum Perl

Vu Wikipedia
Wiesselen op: Navigatioun, sichen

Den Deutsch-Luxemburgisches Schengen-Lyzeum Perl oder Le Lycée germano-luxembourgeois Schengen de Perl ass eng Secondaire-Ganzdagsschoul, déi vum Ministerium für Bildung, Kultur und Wissenschaft vum Saarland an dem lëtzebuergeschen Ministère de l'Éducation nationale et de la Formation professionnelle zesummen entworf a bedriwwe gëtt. D'Gebai vun der Schoul steet zu Perl. Responsabel fir d'Infrastrukturen an den technesche Fonctionnement ass de Landkreis Merzig-Wadern. Direkter ass de Volker Staudt.

Geschicht[änneren | Quelltext änneren]

Op der 7. Saar-Lor-Lux Gipfelkonferenz den 30. Juni 2003 huet eng Kommissioun ënner dem Virsëtz vum Jacques Santer d'Zukunftsbild 2020 fir d'Groussregioun entworf. Doran gëtt och en neie groussregionale Schoultyp verlaangt, deen en europäescht Bewosstsinn vermëttelt an d'Schüler fir en international ausgeriichten Aarbechtsmaart qualifizéiert. Lëtzebuerg an d'Saarland hu sech doropshi gëeenegt, eng gemeinsam Schoul opzemaachen. Eng Expertegrupp huet innerhalb vu kuerzer Zäit e Konzept an déi néideg Konventiounen entwéckelt. De 24. Mee 2005 huet d'Grupp vun Experte sech fir d'éischt getraff.

Den 30. Juni 2006 huet déi Lëtzebuerger Regierung dem Ofkommes zougestëmmt an den 10. Juli huet och des Kreistag Merzig-Wadern dem Ofkommes zougestëmmt. Déi Saarlännesch Landesregierung huet den 11. Juli hiren Accord ginn an den 13. September huet déi däitsch Bundesregierung zougestëmmt.

De 4. Dezember 2006 ass d'Ofkommes tëscht der lëtzebuergescher an der saarlännescher Regierung fir d'Erriichtung vun enger binationaler Schoul vum Premierminister Jean-Claude Juncker, dem Ministerpräsident Peter Müller an der Landrätin vum Kreis Merzig-Wadern, Daniela Schlegel-Friedrich, der Educatiounsministesch Mady Delvaux-Stehres an dem Minister für Bildung, Kultur und Wissenschaft Jürgen Schreier, ënnerschriwwe ginn.

De Lycée gouf de 27. August 2007 offiziell, a Presenz ënner anere vum Jean-Claude Juncker, ageweit an huet deen Dag och d' Dieren fir déi éischt 130 Schüler opgemaach.

De 25. Juni 2008 gouf d'Baugeneemegung fir den Neibau um selwechten Terrain erdeelt an den 11. August 2008 ass de Bau ugefaange ginn.

Den 12. Januar 2009 gouf de Grondstee vun de Gebaier geluecht,[1] déi 25 Milliounen € kascht hunn, vun deene Lëtzebuerg d'Halschent bezilt. Am Schouljoer 2008/9 hat d'Schoul 267 Schüler.

Den 12. Abrëll 2010 war den éischten Deel vum Bau fäerdeg gestallt an den 1. Juli 2011 gouf dat neit Schoulgebai ageweit. D'Gebai huet op 14.000 m² Fläch 56 Klassesäll, vill Spezial- a Kollektivsäll, en Auditorium, eng Mediathéik an eng Kantin.

Am Schouljoer 2012/13 besiche 720 Schüler de Schengener Lycée.

Fir d'Schouljoer 2014/15 hu sech 844 Schüler ageschriwwe, woumat scho bal déi maximal Kapazitéit vun 850-900 Schüler erreecht ass. Ongeféier d'Halschent vun de Schüler kënnt aus Lëtzebuerg, déi aner Halschent aus Däitschland, nëmmen 3 % vun de Schüler kommen aus Frankräich.[2]

De 5. November 2014 gouf de Lycée vum däitsche Bundespresident Joachim Gauck am Kader vu senger offizieller Staatsvisite zu Lëtzebuerg besicht.[3]

Stonnen an der Woch[änneren | Quelltext änneren]

  • Fir all Klassenniveaue gi 36 Wochestonnen zu jee 45 Minutte gehalen.
  • Méindes, mëttwochs a freides daueren d'Coursen bis zirka véier Auer
  • Dënschdes an donneschdes bis zirka eng Auer
  • Samschdes ass fräi

Literatur[änneren | Quelltext änneren]

  • Luxemburger Wort, Jrg 164, Nr. 200, 28. August 2012, S. 19: Vielfalt als Chance

Um Spaweck[änneren | Quelltext änneren]

Referenzen[Quelltext änneren]

  1. Wort.lu: Grundsteinlegung am Schengen-Lyzeum
  2. Irina Figut: Wo Europa Schule macht - Schengen-Lyzeum im achten Jahr des Bestehens, Luxemburger Wort vum 24. September 2014, S. 33
  3. Abschluss einer freundschaftlichen Begegnung op wort.lu