Erneierbar Energie

Eng Wandenergieanlag am Wandpark zu Hengescht

De Begrëff erneierbar Energien, och regenerativ Energië genannt, bezeechent Energie aus nohaltege Quellen, déi no mënschleche Virstellungen ouni Enn sinn.

Dës Energie gëtt aus natierleche Prozesser vun eiser Ëmwelt gewonnen, wéi z. B. duerch d'thermonuklear Ëmwandlung an der Sonn, déi een dann z. B. mat Photovoltaikanlagen a Stroum ëmwandele kann.

Déi verschidden erneierbar Energien

Solarpanneauen um Daach vum Galileo Science Mobil

• Bioenergie (aus Biomass wéi Holz oder Raps)
  • Biodiesel
  • Biogas (Biogasanlag)
• Solarenergie
  • Photovoltaik (Photovoltaikanlag)
  • Solarthermie
  • Thermie (Thermiekraaftwierk)
• Waasserkraaft
  • Staudamm a Staumaueren
  • Stréimungsenergie vum Mier
  • Wellenenergie vum Mier
  • Miereswäermt
• Hëtzt aus der Ëmwelt (Wäermtpompelheizung)
• Wandenergie (Wandrieder respektiv Wandenergieanlag)
• Geothermie

Global Bedeitung

D'erneierbar Energiequelle wäerten déi fossil an nuklear Energiequelle laangfristeg ersetzen, well d'Reserve vun dëse begrenzt op der Äerd ze Verfügung stinn, hiren Asaz ekologesch problematesch ass an an Zukunft den Energieverbrauch weltwäit nach weider klamme wäert. Duerch Fërderung vu regenerativen Energie wäert op laang Zäit d'Schuedstoffbelaaschtung, déi duerch Verfeiere vu Kuel, Ueleg a Gas entsteet, erofgesat ginn an dozou bäidroen, datt de Klimawandel net sou séier viru geet.

Déi héich Uschafungskäschte bei den Anlage vun erneierbarer Energie an déi nach gënschteg konventionell Primärenergieträger verhënneren e séieren Iwwergank. D'Leeschtungsverhältnis zu de konventionellen Energiequellen, wéi d'Notzung vu fossile Brennstoffer oder vu Kärbrennstoffer, ass momentan nach zimmlech niddreg. D'Leeschtungsoffer, virun allem vu Sonn a Wand, ass groussen zäitleche Schwankungen ausgesat.

Kuckt och

• Eurosolar Lëtzebuerg a.s.b.l.
• Lëtzebuerger Energiewirtschaft

Um Spaweck

Commons: Erneierbar Energie – Biller, Videoen oder Audiodateien