Golan

Golan(héichten)
(ar) الجولان (he) גולן

Offiziell Sprooch:

Arabesch, Hebräesch

Staatsform:

Ëmstriddent Gebitt:

Syrien (de jure)

Israel (annektéierten Territoire)
UNIFIL (demilitariséiert Zon)

Fläch:

1.154 km²

Bevëlkerung:

47.400 (31.12.2015)

Wärung:

Schekel

Zäitzon:

UTC +02:00

Kaart vun de Golanhéichten mat Israel am Westen, Syrien am Osten, dem Libanon am Norden a Jordanien am Süden. De roude Beräich am Zentrum markéiert déi demilitariséiert Zon

Spuere vun haarde Kämpf: Zerstéiert Bunkeren

De Golan, oder d'Golanhéichten (Arabesch الجولان al-Dschaulān, Hebräesch רמת הגולן Ramat HaGolan), ass e Plateau mat enger vulkanescher Originn. Et ass en ëmstriddene Landstreech am südwestleche Wupp vu Syrien, deen deels vun Israel besat ass.

D'Golanhéichte leien am Nordoste vum Floss Jordan, tëscht dem Séi Genezareth an der syrescher Haaptstad Damaskus, sinn hiwweleg, schwaach bevëlkert, an et wiisst net vill do. Mä si beherrschen den Dall vum Jordan, wat ee vun de Grënn ass, firwat d'Golanhéichten ëmmer de Mëttelpunkt vum Sträit tëscht Syrien an Israel sinn a waren.

Vëlkerrechtlech gehéiere se zu Syrien, sinn awer 1967 am Krich vu Sechs Deeg vun Israel eruewert an 1980 annektéiert ginn. Dës Annexioun gouf awer ni um internationale Plang unerkannt.

Geographesch Kennzeechen

De gréissten Deel vum Gebitt läit op enger Héicht vun 1.000 m iwwer dem Mier, a bedeckt, bei enger Längt vu 60 km an enger Breet vu 25 km, eng Fläch vun 1.150 km².

Den héchste Punkt, de Bierg Hermon, ass 2.814 m héich. D'Haaptstad ass dat syrescht Qunaitra, eng Stad, déi 1967 ganz zerstéiert gouf an nëmme méi deelweis opgebaut gouf. Duerno hu sech op de Golanhéichten israeelesch Siidler néiergelooss (17.000), wat d'Léisung vun de Problemer ëm de Golan net vereinfacht.

D'Geschicht vun zwéi Kricher

Bekannt goufen d'Golanhéichten am 20. Joerhonnert duerch zwéi Kricher: dee vu Sechs Deeg (1967) an de Jom-Kippur-Krich (1973).

Virum Krich vu Sechs Deeg haten d'Syrer probéiert, een Deel vum Waasser vun de Golanhéichten, dat de Séi Genezareth speist a fir d'Opbereedung vun Drenkwaasser benotzt gëtt, ëmzeleeden. Dat huet Israel sech net bidde gelooss.

De Krich vu Sechs Deeg war e Krich deen Israel géint seng arabesch Nopeschlänner Egypten, Jordanien a Syrien op Provokatioune vun hinnen hi gefouert huet, an dee mat engem Preventivschlag vun der israeelescher Aviatioun agelaut ginn ass. En huet 6 Deeg, vum 5. Juni bis den 10. Juni 1967, gedauert an ass mat der Besetzung vun der Gazasträif an de Golahéichten op en Enn gaangen.

D'Zäitbomm huet awer an där Géigend weidergetickt. Um Ufank vum Jom-Kippur-Krich ass se geplatzt. D'syresch Arméi konnt, ënnerstëtzt vun aneren arabesche Länner, an engem éischten Ulaf d'Golanhéichten erueweren. Am Laf vun enger Géigenattack huet Israel d'Golanhéichten zeréckeruewert. Am Golan huet sech deemools eng grouss Panzerschluecht ofgespillt.

Israel huet dobäi och schwéier Verloschter missen astiechen. Déi deemoleg israeelesch Premierministesch Golda Meir ass dunn, well si där Attack net virgegraff hat, ënner staarke politeschen Drock komm an ass am Dezember 1973 zeréckgetratt. Si gouf vum Jitzchak Rabin am Mäerz 1974 ersat.

D'Bedeitung vum Golan fir Israel

Fir Israel hunn d'Golanhéichten ëmmer eng Gefor bedeit:

well vun de Golanhéichten aus d'israeelesch Siidler am Jordan-Dall vun Zäit zu Zäit vu syreschen Truppe beschoss goufen.
well Drénkwaasserversuergung vun Israel, wéinst syreschen Ëmleedunge vu Quellflëss vum Jordan, a Fro gestallt konnt ginn.

D'Situatioun haut

Israel hält d'Golanhéichten, wou Kräfte vun de Vereenten Natiounen zanter 1974 stationéiert sinn, fir en Desengagement vun den zwou Parteie sécherzestellen, haut ëmmer nach besat. D'international Communautéit betruecht se weider als besat Gebitt an net als israeeleschen Territoire. D'Golanhéichte bleiwen e Sträitpunkt, an eng Eenegung tëscht Syrien an Israel gëtt allgemeng als onwarscheinlech ugesinn.

Um Spaweck

Säit vun der MEDEA: Institut Européen de Recherche sur la Coopération Méditerranéenne et Euro-Arabe, op fr.

Commons: Golan Heights – Biller, Videoen oder Audiodateien