Hergé

Vu Wikipedia
Op d'Navigatioun wiesselen Op d'Siche wiesselen
Hergé
Herge in Angouleme closeup.JPG
Gebuertsnumm Georges Prosper Remi
Pseudonym Hergé
Gebuer 22. Mee 1907
Etterbeek
Gestuerwen 3. Mäerz 1983
Woluwe-Saint-Lambert - Sint-Lambrechts-Woluwe
Doudesursaach Leukemie
Nationalitéit Belsch
Aktivitéit Cartoonist, Schrëftsteller, Comicauteur, Dréibuchauteur
Wikidata-logo-without-paddings.svg
Den Tintin an de Kapitän Haddock; Molerei op engem Bréisseler Hausgiewel

De Georges Rémi, besser bekannt ënner sengem Pseudonym Hergé, gebuer den 22. Mee 1907 zu Etterbeek, a gestuerwen den 3. Mäerz 1983 zu Bréissel, war e belsche Comicauteur an -zeechner.[1][2] Hien ass haptsächlech fir säin Haaptersonnage, den Tintin bekannt. Wéinst sengem Erfolleg a ganz Europa gëllt hien als de Papp vun der Bande-Dessinée.

Quick & Flupke; Molerei op engem Bréisseler Hausgiewel

"Hergé", op Franséisch ausgeschwat, setzt sech aus den Initialen "R. G." vu sengem Numm zesummen.[3]

Säi Liewen[änneren | Quelltext änneren]

Kandheet an Jugend[änneren | Quelltext änneren]

De Georges Rémi ass an der Gemeng Etterbeek, bei Bréissel, gebuer. Säi Papp, den Alexis Rémi an seng Mamm, d'Elisabeth Dufur koumen aus der belscher Mëttelklass.

De belschen Zeechner huet, obwuel hien dacks geplënnert ass, seng ganz Kandheet zu Bréissel verbruecht. Sengen Elteren no, war hien als Kand schwéier ze geréieren, zemools an der Schoul. Hien huet fréi eng Léift fir d'Zeechnen entwéckelt, awer och fir déi amerikanesch an indianesch Kultur. Hie war als Kand just zefridde wann hien zeechne konnt. Seng éischt Biller huet de Georges Rémi mat nëmme 4 Joer gemoolt. Nieft dem Zeechne war den "Hergé" bei de Bréisseler Scouten aktiv. Hie selwer gesäit d'Scouten, bei déi hie mat 11 Joer koum[2], als dat Wichtegst an senger Jugend un. D'Scouten hunn him erlaabt vun Doheem erauszekommen an aner Plaze vun der Welt wéi Italien, d'Schwäiz oder Frankräich z'entdecken. Et ass och wärend deenen "Camps" am Ausland, wou hien am meeschte gezeechent huet a seng éischt Skizze gemach huet. Vun 1921 un, gi seng Skizzen an der Schülerzeitung an am Magazine "Le Boy-Scout" verëffentlecht.[4][1] Well hie fir de Scoutemagazinn skizzéiert huet, konnt hie wärend senger Jugend sou seng zwou Passioune kombinéieren. Seng Skizze signéiert hie, scho vun 1924 un, mat sengem weltberühmte Pseudonym "Hergé".[2] Obwuel hie seng zwéin Hobbyen ausliewe konnt, behaapt de Kënschtler ëmmer erëm eng schwéier Kandheet gehat ze hunn, bedéngt duerch senger Mam hir Krankheet, dem ville Plënneren an der Occupatioun vun der Belsch (1914-1918).

"Je me sentais médiocre et je vois ma jeunesse comme une chose grise, grise".[5] - Hergé

Och wa seng Wierker zu deem Moment nach net bekannt sinn, kritt hien 1925 eng Plaz beim Quotidien "Le 20ème siècle", enger kathoulescher an nationalistescher belscher Zeitung, déi ënner der Leedung vum Norbert Wallez stoung.[2] Dee war op den "Hergé" wéinst senger Aarbecht an der Scouterevue opmierksam ginn. Trotz sengem Talent, war dem "Hergé" säin éischte Passage bei der Zeitung kuerz a wéineg erfollegräich. 1927 huet de jonke Belsch nämlech missen eng Paus mam Zeechnen aleeën, well hie bei d'Arméi agezunn gouf.[1]

Schoul[änneren | Quelltext änneren]

Seng Primärschoul huet de Georges Rémi am L'Athénée Royal d'Ixelles gemaach. Säin éischt Schouljoer war vun der däitscher Occupatioun vu Bréissel am Joer 1914 markéiert. Dei däitsch Dominatioun war och d'Thema vun sengen éischte Biller, déi hien an der Schoul gemoolt huet. No 5 Joer am "Athenée" a mëttelméissege Resultater, krut säi Papp geroden de jonke Georges an den "Institut Saint-Boniface" ze schécken. An där kathoulescher Schoul léiert hie besser an integréiert d'Scoutsgrupp.[4] Och wann hien de Molpräis vun der Schoul erstaunlecherweis ni gewonnen huet[6], konnt hie fir d'Schülerzeitung zeechnen. Mat 18 Joer kritt hien, 1925, säi Schoulofschloss.

Carrière[änneren | Quelltext änneren]

1929 huet dem Hergé seng professionell Carrière bei der Zeitung "Le 20ème siècle" richteg ungefaangen. Hien huet séier mat der Serie Dem Tintin seng Geschichten déi an der Bäilag Le Petit Vingtième publizéiert goufen, op sech opmierksam gemaach. "Tintin aux Pays des Soviètes" war déi 1. Série déi den Hergé lancéiert huet. D'Ziel vun der Geschicht war et d'Liewen an der Sowjetunioun ënnert dem Stalin op anti-kommunistesch Manéier widder ze spigelen. Duerch säin Talent gouf hie séier Chefredakter a war ee vun den éischte francophonen Auteuren déi den amerikaneschen Comic-Stil iwwerholl hunn.[4][2][1]

An den 1930er Joren, huet hien u sengem Tintin Album weidergeschafft, an huet no der Serie "Tintin au pays des Soviètes", d'Serien "Tintin au Congo" an "Tintin en Amérique" publizéiert.[7] Niewebäi, huet hie Les Exploits de Quick et Flupke", "Popol et Virginie au pays des Lapinos" a "Les Aventures de Jo, Zette et Jocko" kreéiert.

No deenen erfollegräiche Joren, koum eng méi schwéier Zäit op den "Hergé" duer. Wärend dem Zweete Weltkrich huet hie akkzépteiert fir de Quotidien "Le Soir" ze publizéieren, deen ënner däitscher Kontroll stoung.[2] Dest huet seng Aarbechtsmethoden geännert, vu dat hien net méi just 2 mol pro Woch publizéieren misst, mais 3-4 Mol. Och, misst hien wärend der Krichszäit seng aktuell Projeten opginn, fir nei Projeten ze starten, déi der dätscher Propaganda méi entspriechen. Esou ass den Album "Le crabbe aux pinces d'or",[2] entworf ginn. Dat huet seng Reputatioun däitlech verschlechtert an him gouf Kollaboratioun mam däitsche Feind virgeworf.

1946 gëtt hien awer vum Raymond Leblanc, engem belschen Resistenzler aus deem Lach erausgeholl. Zesumme lancéieren déi zwéi Manner d'Bicher vum Tintin. Dem Tintin seng Geschichten, déi ee bis zu deem Ament just a Revuë liese konnt, ware vum 26. September 1946 un als Zeitungen disponibel[2]: "Le Journal de Tintin". Domat gouf den Hergé weltwäit bekannt, grad sou wéi déi francophone Comicszeen.

Den 6. Abrëll 1950, grënnt den 43 Järegen seng eegen Entreprise : "Studios Hergé". Bekannt Artisten, wéi den Bob de Moor oder Jacques Martin hun fir den Hergé geschafft.[4] Am Kontext vum kalen Krich an vun den éischten Rumeuren, kennen op den Mound ze fléien, konzentréiert sech den "Hergé" op den Projet, säin Haaptpersonnage den Tintin op den Mound ze schécken. Mat Hëllef vun sengen Zeechner, ass dem "Hergé" säin Projet am Dezember 1953 fäerdeg an esou ass sinn d'Albumen "Objectif Lune" an "On a marché sur la Lune" vollstänneg.

Duerno konzentréiert sech den Hergé op d'Perfektionéieren vun sengen Wierker wéi "Quick et Fulpke", awer haaptsächlech op den Tintin an entwéckelt an den 1950er Joren den besonneschen Molstil "Claire Ligne". Dësen Stil huet weltwäit vill Epilogen fonnt. Och, war et dem "Hergé" wichteg seng Aarbechter, wei den de Moor ze forméieren, fir dass si seng Wierker weider féieren kennen. Ab den 1960er Joren war hien manner aktiv an huet ëmmer manner Geschichten publizéiert. Nodeems hien nach 1966, "Vol 714 pour Sydney" an 1975 "Tintin et les Picaros" publizéiert huet, ass hien krank ginn.

Krankheet an Dout[änneren | Quelltext änneren]

Ab dem Joer 1981, huet dem "Hergé" seng Gesondheet ugefaangen sech ze verschlechteren. Hien leit ëmmer méi un Longeproblemer an un enger Anemie. Dëst hält hien och ob un sengen Wierker weiderzeschaffen. Den 25. Februar 1983, gëtt hien an d'Spidol ageliwwert, wou hien an den Komma fëllt. Nëmmen eng Woch drop, den 3. Mäerz 1983, stierft den weltbekannten Artist an der Bréisseler Klinik Saint-Luc, am Alter vun 75 Joer. Eng vun den verschiddenen Theorien iwwer den Doud vun da Comic-Ikone ass, dass hien un Leukemie gestuerwen ass. Op Ufroen vun senger Famill gouf hien um Kierfeg vun Dieweg begruewen.[2][4]

Privatliewen[änneren | Quelltext änneren]

Den "Hergé" war zweemol bestuet. Seng 1. Fra, d'Germaine Kieckens, huet hien beim "Le 20ème Siècle" kennegeléiert. Si war d'Sekretärin vun der Zeitung an déi Zwee waren vun 1932 bis 1975 bestuet. 2 Joer no der Scheedung, huet hien sech erëm bestuet, des keier mam Fanny Rodwell, enger belscher Artistin. D' Bestietnes huet bis zum "Hergé" sengem Dout, 6 Joer dono, gedauert. Hien hat keng Kanner.[8]

Beléiftheet[änneren | Quelltext änneren]

Erfolleg[änneren | Quelltext änneren]

  • Méi wéi 230 Milliounen Exemplare vum Tintin senge Geschichten goufe weltwäit verkaf a goufen an 80 verschidde Sproochen iwwersat.[9]
  • Den "Musée Hergé" zu Louvain-la-Neuve huet 2009 seng Dieren opgemaach a ganz vill Ausstellunge ginn him zu Éiere gehalen[10].

An aaneren Medien[änneren | Quelltext änneren]

  • Zwee animéiert Fernsehserien goufen iwwert dem Hergé säin Haaptwierk, dem Tintin seng Geschichten, gedréint : "Hergé's Adventures of Tintin" (1958-1962) an "The adventures of Tintin" (1991-1992)
  • Em déi zéng Filmer hunn sech un dem Hergé sengen Comics inspiréiert, ënnert anerem : "Tintin and the Lake of Sharks" (1972) oder "Tintin and the blue Oranges" (1964).
  • Souguer Videospiller,speziell an den 1990er Joeren, wéi "Tintin in Tibet" (1996) sinn an Éieren vum Hergé créeiert ginn.[11]

Préiser[änneren | Quelltext änneren]

  • Temple de la renommée Jack Kirby (1999)
  • Temple de la renommé Will Eisner (2003)
  • Prix Adamson du meilleur auteur international (1971)
  • Prix Yellow Kid (1972)
  • Grand Prix Saint-Michel (1973)


Haaptwierker[änneren | Quelltext änneren]

Totor

Les aventures de Tintin

Quck et Flupke

Les thriomphes de l'Aigle Rouge

Popol et Virgine au pays des Lapions

Jo, Zette et Jocko

1926

1929

1930

1930

1934

1936

Réferenzen[änneren | Quelltext änneren]


  1. 1,0 1,1 1,2 1,3 http://fr.tintin.com/herge
  2. 2,0 2,1 2,2 2,3 2,4 2,5 2,6 2,7 2,8 https://www.bedetheque.com/auteur-82-BD-Herge.html
  3. Tintin à Bruxelles
  4. 4,0 4,1 4,2 4,3 4,4 http://www.histoire-des-belges.be/quelques-celebrites-belges/herge
  5. Extrait de documentaire. N. Sadoul, Tintin et moi, Production Angel, 2003.
  6. Le Monde de Tintin (Archives)
  7. http://fr.tintin.com/news
  8. https://www.grazia.fr/culture/sorties/herge-au-pays-des-femmes-829104
  9. http://fr.tintin.com/essentiel
  10. http://www.museeherge.com/fr/visite/about
  11. https://en.wikipedia.org/wiki/List_of_Tintin_media