Maximäin vun Tréier

Maximäin vun Tréier
Titel
Titel	fréiere Bëschof vun Tréier
Biographie
Gebuer	3. Joerhonnert Silly
Gestuerwen	12. September 346 Poitiers
Graf	Tréier
Aktivitéit	Réimesch-kathoulesche Bëschof
Aner Informatiounen
Statut	Helleg
Gedenkdag	29. Mee

De Maximäin vun Tréier (och nach Maximin), och als „Hellege Maximäin“ bekannt, gebuer um Enn vum 3. Joerhonnert zu Silly, a gestuerwen den 12. September 346 zu Poitiers, gouf 329 Bëschof vun Tréier.

De Virgänger am Amt war den hellegen Agritius. Hie war e Géigner vum Arianismus an huet sengem Frënd a Matstreider Athanasius vun 335 bis 337 Asyl zu Tréier ugebueden.

De Maximäin ass 346 um Wee vu Konstantinopel op Poitiers gestuerwen. Säin Nofollger Paulinus huet den 29. Mee 353 seng stierflech Iwwerreschter op Tréier iwwerfouert. Duerfir ass den 29. Mee och säin Namensdag. Bei sengem Graf gouf am 6. Joerhonnert eng Benediktinerabtei gegrënnt (déi spéider Räichsabtei St. Maximin). D'Kierch St. Johannes gouf méi spéit a St. Maximin ëmgenannt.

Duerstellung

De Maximäin vun Tréier gëtt dacks mat engem Bier representéiert, well der Legend no e Bier säin Iesel doutgemaach hat an deen als Strof seng Laascht op Roum huet missen droen.

Veréierung

Dem Maximäin vun Tréier säin Dag ass an der kathoulescher Kierch den 29. Mee an an der griichesch-orthodoxer den 3. Oktober. Hie gouf virun allem an der Géigend vun Tréier, och am Raum vum haitege Lëtzebuerg, an am Elsass veréiert.

Hien ass de Patréiner fir d'Gefore vum Mier, dem Reen an dem falschen Eed.

Kierchen a Kapellen zu Lëtzebuerg, déi him geweit sinn

• Kierch Gräisch
• Kapell zu Kënzeg
• Kierch Kielen
• Kierch Konstem
• Kierch Iewerleng
• Kierch Mutfert
• Kierch Nidderkäerjeng
• Kierch Pënsch
• Kierch Ueschdref
• Kierch Wal

Kuckt och

• Lëscht vun de chrëschtlechen Hellegen
• Refuge Sankt Maximäin

Um Spaweck

Commons: Maximäin vun Tréier – Biller, Videoen oder Audiodateien

• De Maximäin vun Tréier am ökumeenesche Lexikon vun den Hellegen (de)