Tektit

Vu Wikipedia
Wiesselen op: Navigatioun, sichen
Schwaarzen Tektit
Moldavit
Aerodynamesch geformten Australit

Tektitten (vum Griicheschen tektos - geschmollt) si bis zu e puer Zentimeter grouss Glasobjeten, déi zwar en ierdeschen Urspronk hunn, awer duerch den Aschlag vu grousse Meteoritten op der Äerduewerfläch entstane sinn.

Duerch den Aschlag gëtt ierdescht Material geschmollt a bis zu e puer honnert Kilometer fortgeschleidert, woubäi et zu Glas erstarrt. Tektitte si schwaarz oder gréngelzeg duerchsiichteg. D'Form variéiert vun aerodynamesch ronn, scheiwen-, drëps- oder hantelfërmeg bis onregelméisseg.

Duerch d'Aart a Weis wéi se entstinn, sinn d'Plaze wou Tektitte fonnt ginn mat Aschlagkrateren associéiert. Sou ginn Tektitten déi an Tschechien fonnt ginn "Moldavitte" genannt, a mat dem Nördlinger Ries a Verbindung bruecht.

Bis elo si weltwäit eréischt véier Streefelder bekannt, wouvun der vun dräi hiren Urspronkskrater bekannt ass.

E puer Type vun Tektitten, gruppéiert no de véier bekannten ënnerschiddleche Streefelder:

Europäescht Streefeld
Nördlinger Ries, Däitschland, e ronn 14,6 Millioune Joer alen Aschlagkrater, dee während dem Ries-Evenement entstoung.
Australasiatescht Streefeld
Obwuel dëst Streefeld eendeiteg dat gréisst ass a ronn 10 % vun der Äerduewerfläch bedeckt, konnt bis elo nach kee Krater nogewise ginn. De Krater ass wahrscheinlech um Mieresbuedem a gouf vu méi jonken Oflagerungen iwwerdeckt. Den Alter vun den Tektitte gouf op ronn 0,7 Ma bestëmmt.
  • Australitten (Australien, donkel, meeschtens schwaarz)
  • Indochinitten (Südostasien, donkel, meeschtens schwaarz)
  • Chinitten (China, schwaarz)
Nordamerikanescht Streefeld
Chesapeake-Bay-Krater, USA, Alter: 34 Ma. Obschonn d'Bediasitten zanter en etleche Joerzéngte bekannt sinn, gouf de Krater deen dozou gehéiert eréischt 1990 erkannt, well e gréisstendeels ënner dem Mier läit a vollstänneg vu Sedimente bedeckt gouf.
  • Bediasitten (USA, Texas, schwaarz)
  • Georgiaitten (USA, Georgia, gréngelzeg)
Elfebeeküst
Lake Bosumtwi-Krater, Ghana, Alter: 1 Ma
  • Ivoritten (Elfebeeküst, schwaarz)

Wéi Obsidian goufen och Tektitte schonn virun etleche Joerdausenden fir Gebrauchsgéigestänn, als Bijou a fir kultesch Zwecker gebraucht. Duerch Meteorittenaschléi ginn och sougenannt Impaktglieser produzéiert. Am Géigesaz zu Tektitte gi si net ewechgeschleidert, mä verbleiwen an der Ëmgéigend vum Krater.

Kuckt och[änneren | Quelltext änneren]

Saturn 01.svg Portal Astronomie

Literatur[änneren | Quelltext änneren]

Um Spaweck[änneren | Quelltext änneren]

Commons: Tektites – Biller, Videoen oder Audiodateien