The One
The One war eng lëtzebuergesch Castingshow, déi fir am Juni 2012 op RTL Télé Lëtzebuerg gesent gouf. An dëser Sendung gëtt déi Persoun mat der beschter Gesanksstëmm vu Lëtzebuerg gesicht. Et ass d'Nofollegsendung vu Wanns de eppes kanns!. D'Show orientéiert sech um Format vun The Voice.
Produktioun
[änneren | Quelltext änneren]RTL Lëtzebuerg hat am Virfeld vun der Emissioun Kontakt mat de Produzente vun The Voice opgeholl, fir déi Sendung och zu Lëtzebuerg ze produzéieren, mee déi hu gesot, Lëtzebuerg wier ze kléng dofir an datt et net genuch lokal Talent géif ginn. Dowéinst huet RTL säin eegent Konzept entwéckelt. De Programm hat e Budget vun 120.000 Euro.[1]
De Prinzip vun der Emissioun
[änneren | Quelltext änneren]All Kandidat ass an engem Tounstudio anonym an onsiichtbar virun enger Jury opgetrueden, déi dann entscheet huet, wien an d'Virauswiel koum. Nëmmen d'Stëmm gouf als Krittär geholl. Vun de 16 Kandidate gouf jee ee Lidd opgeholl an d'Lidder ënner engem Pseudonym e puer Wochen op RTL Radio Lëtzebuerg an Eldoradio gespillt.[1] Si konnten och per Internet gelauschtert an kaaft ginn. D'Leit konnte per SMS an duerch d'Kafe fir d'Lidder ofstëmmen.
Déi 8 bescht Kandidate koumen an d'Finall an eng Show, an där all Kandidat zwéi Lidder konnt presentéieren. D'Zuschauer an der Hal an doheem konnte per SMS an iwwer d'Tële vun der Post de Gewënner wielen. Eréischt beim Sange vum zweete Lidd gouf déi wierklech Identitéit vun de Kandidaten opgedeckt.
Presentéiert gouf déi éischt Sendung vum Bob Konsbrück an der Monica Semedo. De Gast Waltzing war zoustänneg fir d'Produktioun vun de Lidder am Tounstudio an zesumme mat senger Band fir d'musikalesch Begleedung bei der Live-Sendung, déi an der Rockhal war.
Jury
[änneren | Quelltext änneren]An der Jury souzen d'Sängerin Thorunn Egilsdottir, de Sänger Daniel Balthasar, den David Moreira (Sänger vun der Band Eternal Tango) an den Olivier Toth, dem Direkter vun der Rockhal.[2]
Kandidaten
[änneren | Quelltext änneren]Et gouf just eng Staffel vun The One, fir déi am Abrëll 2012 zwou Casting-Ronnen organiséiert goufen. Do sinn am Ganzen zirka 250 Kandidaten ugetrueden.[1] De 17. Abrëll huet d'Jury decidéiert, wien an d'Virauswiel koum. Den 29. Mee ass no der Ofstëmmung follgend Resultat erauskomm:
| Nr. | Lidd | Pseudonym | Voting % | Selektionéiert |
|---|---|---|---|---|
| 1 | Heavy Cross | Gossip Girl | 6.77 | nee |
| 2 | Fallin' | Fallin Alice | 9.93 | jo |
| 3 | Rolling in the Deep | Little Blue | 6.70 | nee |
| 4 | One Night Only | Jenny River | 7.48 | jo |
| 5 | Someone Like You | Laurie Soul | 10.00 | jo |
| 6 | Valerie | Miss Amy | 5.28 | nee |
| 7 | Angels | Willy Stone | 10.06 | jo |
| 8 | You and I | Stefani Sky | 3.83 | nee |
| 9 | Fever | Peggy Groove | 0.88 | nee |
| 10 | I Wish I Was a Punk Rocker | Sandy Pebble | 9.84 | jo |
| 11 | Je veux | Baby Zaz | 7.92 | jo |
| 12 | Warwick Avenue | Aimee Ann | 8.52 | jo |
| 13 | Recipe | Queen Aura | 9.90 | jo |
| 14 | Stronger Than Me | Jacky Funk | 0.79 | nee |
| 15 | Use Somebody | Prince Leon | 2.10 | nee |
| 16 | --- | opginn |
Finall
[änneren | Quelltext änneren]An der Finall, enger Livesendung, déi den 10. Juni sonndesowes an der Rockhal war, hu sech déi aacht Finaliste virun der Jury an dem Publikum presentéiert. Jiddwereen huet als éischt hanner engem Schierm, wou ee just d'Konture gesinn huet, säin éischt Lidd presentéiert. Gläichzäiteg konnt och scho per SMS ofgestëmmt ginn an den aktuelle Stand vun der Ofstëmmung ass och permanent ugewise ginn.
Duerno huet all Kandidat sech kuerz virgestallt an huet dann en zweet Lidd gesongen. Du konnt weider ofgestëmmt ginn, et ass awer kee Resultat méi ugewise gi bis zum Schluss vun der Ofstëmmung. D'Jury hat keen Afloss méi op d'Endresultat. D'Resultater sinn du fir jiddweree bekannt gemaach ginn:
| Plaz | Pseudonym | Numm | Voting %[3] |
|---|---|---|---|
| 1 | Willy Stone | Armand Thies | 18.37 |
| 2 | Laurie Soul | Nadine Rodrigues | 16.59 |
| 3 | Sandie Pebble | Kim Girrens | 13.84 |
| 4 | Jenny River | Laura Dumlich | 13.52 |
| 5 | Aimee Ann | Debbie Kirsch | 12.87 |
| 6 | Baby Zaz | Caroline Antoine | 12.71 |
| 7 | Fallin Alice | Carina Araujo | 7.33 |
| 8 | Queen Aura | Caroline Molitor | 4.77 |
An den éischten zwou Wochen huet de Public 20.000 SMSe geschéckt.[1] Am Ganze goufe schlussendlech 42.000 SMSe geschéckt.[4],[3]
Kuckt och
[änneren | Quelltext änneren]- Talents, eng lëtzebuergesch Castingshow aus dem Joer 2002.
- Wanns de eppes kanns!, eng lëtzebuergesch Castingshow aus de Joren 2009-2011.
- Brand Your Band, e lëtzebuergesche Museksconcours aus de Joren 2011-2013.
Referenzen
[Quelltext änneren]- 1 2 3 4 paperjam.lu: «The One, c’est déjà 20.000 SMS» vum Nicolas Raulot (24. Mee 2012)
- ↑ luxtimes.lu: Have you got the voice to be “The One”? (21. Mäerz 2012)
- 1 2 wort.lu: Armand Thies ist "The one" (11. Juni 2012)
- ↑ rtl.lu: THE ONE: Armand Thies alias Willy Stone est "The One" (11. Juni 2012)