Utopolis Belval

Vu Wikipedia
Wiesselen op: Navigatioun, sichen
D'Salle des premières

Utopolis Belval ass zanter dem 17. Juni 2013[1] den Numm vun engem Multiplex-Kino mat 7 Säll fir am Ganze 1506 Spectateuren um zweete Stack vum Akafszentrum Belval Plaza 1 um Belval, deen den 18. Dezember 2008 als CineBelval seng Dieren opgemaach hat.

Bedriwwe gëtt e vun der Utopia Group, déi d'Säll an d'Exploitatioun am Juni 2013 vun der CineBelval SA iwwerholl huet. CineBelval SA huet zulescht zu 100 % der Société civile Financière Mercure gehéiert. Wéi de Kino opgemaach huet, housch den Exploitant nach Caramba Sud SA, un där Financière Mercure zu 40,8 %, Massard Participations (vum Raymond Massard) 18,4 % a Multiplan (déi d'Gebai gebaut huet) zu 40,8 % bedeelegt waren.[2] Multiplan huet sech uganks 2012 zréckgezunn, an am August 2012 de Massard. Direkter ass ewell de Jean Villemin.[3]

D'Säll[änneren | Quelltext änneren]

D' Salle des premières ass dem Bedreiwer no dee gréisste Kinossall am Benelux. En huet 540 Sëtzplazen an den Ecran ass 22 m breet. En huet eng dräifach Tounverstäerkung an e roude Riddo.

D'Säll 2 an 3 hu Plaz fir iwwer 220 Leit an d'Säll 4 bis 7 bis zu 128 Plazen.

  • An alle Säll si Plaze reservéiert fir Leit mat engem Rollstull, déi de Kinoskomplex vum Parking aus mat engem Lift direkt erreeche kënnen.
  • All Säll si mat Digitalprojekteren austafféiert. D'Säll 1, 3, 4, a 6 hunn doriwwer eraus 35mm Filmprojekteren. Fir dräi Säll sinn 3D-Projektere virgesinn.
  • All Sall, bis op dee groussen, huet eng duebel Amplificatioun an entsprécht domat der THX-Virschrëft.
  • An de Säll huet all Spectateur 130 cm Plaz fir seng Been an op all Säit eng eegen Aarmstäip, en Halter fir Gedrénks an eng integréiert Kappstäip.
  • Duebel "Loveseats" (vun deene Jonke "Knuutschsëtzer" genannt) erlaben et verléifte Koppelen oder Famillje mat klenge Kanner beieneen ze sëtzen ouni Aarmstäipen dotëscht.

Fir Zäit ze spuere ginn d'Billjeeën an d'Iessen an de Keese verkaaft. D'Plaze kënnen och direkt vun doheem iwwer den Internet kaaft a reservéiert ginn, an 't kann een dann ouni Billjee direkt op seng Plaz goen. All Sëtzplaz ass nämlech mat engem Sensor equipéiert, deen et erlaabt, zu all Ament ze gesinn, wat fir Fotelle reservéiert a bezuelt, a wat fir besat sinn.

Deen éischte Film[änneren | Quelltext änneren]

Deen éischte Film, deen am grousse Sall gewise gouf, war dem Baz Luhrmann säin Australia mam Hugh Jackman an der Nicole Kidman. D'Feierlechkeete fir d'Ouverture haten am leschte Moment ëm een Dag misse verréckelt ginn, well mat Zäite keng gréng Luucht vun der Bauinspectioun virlouch.

No 2 Joer[änneren | Quelltext änneren]

Kuerz viru sengem zweejärege Bestoe huet de CineBelval säi 500.000ste Spectateur kënne begréissen. Bannent 2 Joer sinn do 550 Filmer an am Ganze méi wéi 24.000 Séancë gewise ginn.[4]

Um Spaweck[änneren | Quelltext änneren]

Referenzen[Quelltext änneren]

  1. "Kino: Aus CineBelval gëtt Utopolis Belval." RTL.lu - 17.06.2013, 16:30 | Fir d'lescht aktualiséiert: 17.06.2013, 16:44.
  2. "La purge Massard", d'Lëtzebuerger Land 9.11.2012, Nr.45, S.8
  3. "Ciné Belval: Jean Villemin offiziell neien Direkter vum Kino." RTL.lu - 21.08.2012, 16:20 | Fir d'lescht aktualiséiert: 21.08.2012, 16:35.
  4. Caramba Magazine Movie Nr 20, Dez. 2010-Jan. 2011, S.3.