Atmosphär vun der Äerd

Ee Sonnenënnergang iwwer dem Indeschen Ozean, vun der ISS aus fotograféiert. Et kann een déi verschidde Schichten erkennen: D'Troposphär, orange a giel, déi schwaarz Flécken heiranner si Wolleken; doriwwer, déi beige a wäiss Regioun ass d'Stratosphär; déi blo Zone sinn déi aner Schichten déi da lues an de schwaarze Raum iwwerginn .

D'Atmosphär vun der Äerd ass d'Loft déi ronderëm der Äerd ass a si ëmschléisst. Et ass e Gemësch aus verschiddene Gasen.

Et gi ganz ënnerschiddlech Schichten (Sphären).

Déi ënnescht ass d' Troposphär mat hirer wiederbildender Zirkulatioun, déi iewescht, d'Exophär, ass eng äusserst dënn Schicht, déi an de Raum iwwergeet.

D'Atmosphär ass ongeféier 700 km déck an den Iwwergank an de Raum (wou guer keng Loft méi ass) ass net abrupt. D'Gasdeelercher gi lues a lues ëmmer méi dënn bis si op eng Kéier ganz verschwonne sinn.

Ouni d'Atmosphär wier d'Äerd esou wéi de Mound, et géif kee Waasser gi fir ze drénken an keng Loft fir z'otmen. Ausserdeem schützt si eis virun de Sonnestrahlen a viru Meteoraschléi.

Schichte vun der Atmosphär

D'Atmosphär gëtt, jee no Héicht a jee no Temperatur, an ënnerschiddlech Schichten agedeelt.

Ganz ënnen ass d' Troposphär, wou d'Temperatur, bei klammender Héicht, ëmmer méi erof fält. Si geet bis ongeféier 10 km an d'Héicht.

An der Stratosphär, bis zu 50 km déck, hëlt d'Temperatur, bei klammender Héicht, zou.

Tëschent 50 km an 100 km läit d'Mesosphär. Hei fält Temperatur erëm rapid erof.

Di besonneg staark ioniséiert Schichten tëschent 50 an 300 km Héicht nennt een Ionosphär.

An der Thermosphär an an der Exosphär gëtt d'Dicht vum Gas ëmmer méi kleng. D'Grenz vun der Exosphär läit bei ongeféier 700 km Héicht.

Kuckt och

• Meteorologie

Commons: D'Atmosphär vun der Äerd – Biller, Videoen oder Audiodateien