Chapter Two

Chapter Two war eng bekannt lëtzebuergesch Rockgrupp.

Geschicht

D'Grupp ass den 1. September 1983 vum Georges Zepp an Tom Bellion gegrënnt ginn aus Membere vun zwou anere Gruppen, Pipeline a Barrister. Am Ufank stounge 7 Leit op der Bün. Nodeem e puer Leit nees opgehalen hunn,huet d'Grupp 1985 aus follgende Leit bestanen: Georges Zepp, Mike Zepp, Tom Bellion, Jang Bracci a Guy Kess.

D'Grupp huet 1985 och beim Concert fir Afrika matgemaach. 1986 huet de Guy Kess d'Grupp nees verlooss. Si hunn nach en Abschiedsconcert ginn, an hunn duerno eng Paus fir ongeféier 1 Joer gemaach.

1987 ass d'Marion Welter als Lead-Sängerin bei d'Grupp derbäikomm.

Am Juni 1988 hunn de Jang Bracci an de Mike Zepp opgehalen. Si goufen duerch de Claude Geimer an de Marc Reichling ersat. Am selwechte Joer hu se déi éischt Maxi-Single opgeholl a e bëssche méi spéit en CD-Sampler.

1989 hu se eng zweet Paus ageluecht wéinst Solo-Projete vun eenzele Memberen.

Mëtt 1992 ass d'Grupp reaktivéiert ginn a se hu sech preparéiert fir eng nei CD opzehuelen. Enn 1992 hu se awer wéinst dem Krichsausbroch a Somalia fir d'éischt nach e karikative Projet, d'Hope Project Band duerchgezun.

Am September 1993 koum dunn awer hir CD Wild Strawberries mat Lidder an dräi Sproochen eraus.

Discographie

• 1988: Chapter Two (Vinyl Maxi-Single)
• 1988: CD-Sampler
• 1993: Wild Strawberries (CD-Album)
• 1994: Greenpeace-CD: No time to waste (Lidd 6: Blind man)
• 1994: Rock um Knuedler Vol.4 (Lidder 3 a 4)

Literatur

• Haas, Luke: Lëtzebuerger Rocklexikon, 1988, Éditions Phi, ISBN 3-88865-064-X
• Haas, Luke: Lëtzebuerger Rocklexikon II (1987-1994), 1995, Éditions Revue, ISBN 2-919999-03-6