Eech zu Koler

Vu Wikipedia
Op d'Navigatioun wiesselen Op d'Siche wiesselen
Geographesch Koordinaten:
E Stamm deen a véier gedeelt ass.
De wäisse Fäil riets ënnen am Bild weist de Pad dee bei d'Eech féiert.

Déi bemierkenswäert Eech zu Koler ass eng Summereech (Quercus robur; chêne pédonculé; Stieleiche) déi am Ierwebësch am Oste vun der Uertschaft steet.

D'Eech ass bemierkenswäert wéinst hirem aussergewéinleche Stamm, dee sech an enger Héicht vun 1,50 m a véier Niewestämm opdeelt, déi bis 35 m eropgewuess sinn. D'Kroun vum Bam ass wéineg an d'Breet entwéckelt, wat drop zréckzeféieren ass, datt d'Eech an engem dichte Bestand gewuess ass.

Dës Eech, där hiren Alter op ronn 300 Joer geschat gëtt, gouf 1981 fir d'éischt als bemierkenswäerte Bam gefouert.

Den Ëmfank vum Stamm, op Broschthéicht gemooss, huet folgendermoossen zougeholl:

  • 1980: 4,80 m, bei enger Gréisst vun 33m
  • Ëm 2000: 5,08 m, bei enger Gréisst vun 35 m.

Domat ass dëse Bam déi 7. déckst Eech zu Lëtzebuerg.

Wou de Bam steet[änneren | Quelltext änneren]

De Bam fënnt ee wann een zu Koler d'Strooss op Garnech erop fiert. Nom Ausgank vu Koler hëlt een, ongeféier op hallwer Héicht vum Hank, deen drëtte goudronnéierte Feldwee op der lénkser Säit. Do wou de Macadam ophält geet et zu Fouss weider, laanscht de Bëschrand, bis de Wee an de Bësch eraféiert. De Wee dréint do no riets a gëtt dann e schmuele Pad dee queesch duerch de Bësch féiert. No zirka 100 m am Bësch fält dann op der lénkser Säit, zirka 20 m vum Pad ewech, déi gesichten Eech duerch hire mächtegen, a véier gedeelte Stamm op. Ronn 50 m hanner der Eech féiert de Pad op eng Wiss, déi op béide Säite vum Bësch encadréiert ass.

Quellen[änneren | Quelltext änneren]

  • Sinner, J. et al., 2002. Les arbres remarquables. Administration des eaux et forêts. Musée national d'histoire naturelle. 255 S. (Cf. S. 38-39, Text a Foto).
  • Administration des eaux et forêts, 1981. Arbres remarquables du Grand-Duché de Luxembourg. Imprimerie Saint-Paul, 167 S. (Cf. S. 18-19, Foto an Text).

Kuckt och[änneren | Quelltext änneren]

Um Spaweck[änneren | Quelltext änneren]

Commons: Eech zu Koler – Biller, Videoen oder Audiodateien