Kapell Kapweiler

Kapell vu Kapweiler
Kapell vu Kapweiler (2013) Kapell vu Kapweiler (2013)
Uertschaft / Plaz	Kapweiler
Par	Äischdall-Helpert Saint-Willibrord
Dekanat	Zentrum
Numm / Patréiner	Hl. Anna
Desakraliséiert	Mee 2017
Baujoer	1866
Koordinaten	49° 44’ 23.6’’ N       05° 58’ 09.7’’ O
Kierchen - Kapellen

Den Altor

Altordetail

D'Kapell vu Kapweiler war eng kathoulesch Kapell, déi bis Mee 2017 zur Par Sëll gehéiert huet, duerno zur Par Äischdall-Helpert Saint-Willibrord am Dekanat Zentrum, an zu der Gemeng Sëll.

D'Patréinesch war d'helleg Anna, där hiert Fest de 26. Juli gefeiert gëtt.

D'Kapell gouf am Joer 2020 entweit.

De 6. November 2020 gouf s'als nationaalt Monument klasséiert.

An der Zäit goung all Joer um leschte Juli-Sonndeg d'Annë-Pressessioun vu Sëll op Kapweiler.

Gebai

De massive quadrateschen Tuerm ass vu 1505, dem Grënnungsjoer vun der Kapell. Dogéint sinn d'Kiercheschëff an de Chouer no bedeitenden Aarbechten am Joer 1705 am haitege Stil fäerdeg gestallt ginn. An d'Kapell kënnt een duerch d'Portal vum Tuerm eran.

Déi véier Bläiglasfënstere mat den Evangelistesymboler kommen aus dem Atelier W.H. Jansen vun Tréier a goufe warscheinlech kuerz virum Éischte Weltkrich montéiert.

Am Joer 2005 gouf "500 Joer Sankt Anna Kapell zu Kapwëller" gefeiert. Zu dësem Jubiläum gouf d'Kapell frësch ugestrach. De Parrot Sëll-Gräisch-Simmer hat e Parfest organiséiert, an de Sëller Schoulmeeschter Guy Wolff huet am Optrag vun der Sëller Gemeng e Buch iwwer d'Kapweiler Kapell geschriwwen.

Altor

Kuckeswäert ass besonnesch de Barockaltor, deen déi ganz Breet vum Chouer ausfëllt. D'Holzstatue op der lénkser Säit weist den hellege Benedikt an op der rietser seng Schwëster, d'Helleg Scholastika.

D'Altorbild stellt déi lescht Owesmoolzecht duer a gouf vum Pierre Maisonnet gemoolt. D'Bild ass op den zwou Säite vun enger ionescher a vun enger korinthescher Sail ëmginn.

Am Baldachin gesäit een de Wope vum 41. Abt vun der Benediktinerabtei Münster vu Lëtzebuerg, dem Benedikt Forting, deen déi Abtei vu 1717 bis zu sengem Doud um 7. Januar 1743 geleet huet.

Et gëtt spekuléiert, datt den Altor virun der Franséischer Revolutioun an där Abtei stoung.

Literatur

• Guy Wolff: 1505-2005 500 Joer Sankt Anna Kapwëller, 2005.

Kuckt och

• Lëscht vu reliéise Gebaier zu Lëtzebuerg

Um Spaweck

Commons: Kapell Kapweiler – Biller, Videoen an Audiodateien

• D'Fënstere vun der Kapell vu Kapweiler op der Websäit vun der Stiftung Forschungsstelle Glasmalerei des 20. Jh. e. V. (de)

D'Kapell aus südlecher Richtung gesinn (2013)