Guardian Industries

Vu Wikipedia
(Virugeleet vu(n) Luxguard)
Op d'Navigatioun wiesselen Op d'Siche wiesselen
Guardian Industries Corp.
Guardian Industries Logo 2015.png
Logo vu Guardian Industries
Typ: Privat
Grënnung: 1932
Sëtz: Auburn Hills, Michigan, Flag of the United States.svg USA
Mataarbechter: 17 000 weltwäit (2015?)[1]
1 200 zu Lëtzebuerg (2015)
Branche: Industrie
Produit: Glas
Um Spaweck: www.guardian.com
www.guardian.lu

Guardian Industries Corp. ass eng US-amerikanesch industriell Entreprise, déi international aktiv ass. Si ass ee vun de weltwäite Leaderen an der Produktioun vu Flaachglas, fäerdege Glasprodukter a Glasfaserisoléierung a schafft och an der Distributioun vu Baumaterialien. Si ass an Nord- a Südamerika, Europa, Asien an am Noen Osten aktiv.[1] Den europäesche Sëtz vu Guardian ass zu Nidderkäerjeng.

Geschicht[änneren | Quelltext änneren]

Guardian gouf 1932 als Guardian Glass Company gegrënnt a war deemools eng Firma, déi viischt Fënstere fir d'Autosindustrie produzéiert huet.

1970 gouf déi éischt Fabrik fir Flaachglas ("Floatglas") am Bundesstaat Michigan opgemaach. 2015 hat Guardian 28 där Fabriken op der Welt.[1] An den 1980er huet d'Entreprise ugefaange sech ze diversifizéieren a mat der Produktioun vu Glasfaserisoléierung ugefaangen.

Den 11. Juli 1980 gouf a Presenz vum William Davidson, dem Grënner vu Guardian, an dem Wirtschaftsminister Gaston Thorn de Grondstee fir de Bau vum Wierk Luxguard zu Nidderkäerjeng geluecht. Et war dat éischt Wierk vu Guardian an Europa an eng exakt Kopie vum Wierk zu Kingsburg an den USA. Mat der Produktioun am Wierk gouf den 21. November 1981 ugefaangen.[2] Duerno sinn nach weider Wierker an Däitschland, Spuenien, England, Ungarn a Polen opgemaach ginn.

1988 ass d'Wierk Luxguard II zu Diddeleng opgaangen.[3] Véier Joer méi spéit huet Guardian Industries nach en anert Wierk zu Gréiwemaacher opgemaach (Guardian Automotive E.S.A.), wat 2014 awer erëm verkaaft ginn ass.[4][5]

1998 huet d'Entreprise d'Firma Builder Marts of America (BMA) an 2000 Cameron Ashley Building Products (haut Guardian Building Products Distribution) kaaft an domat d'Presenz vu Guardian am Beräich vun der Distributioun vu Baumaterial gestäerkt huet.

Den 1. Juli 2015 huet Guardian säin neien europäesche Sëtz mat 120 Employeën zu Bartreng ageweit. D'Büroe ware virdu beim Diddelenger Wierk.[6] Op hirer Websäit huet Guardian 2015 uginn, 1200 Leit zu Lëtzebuerg ze beschäftegen.[7]

Referenzen[Quelltext änneren]

  1. 1,0 1,1 1,2 Geschicht op der Websäit vu Guardian (gekuckt den 1. Juli 2015)
  2. industrie.lu: Luxguard I S.A. (gekuckt den 1. Juli 2015)
  3. industrie.lu: Guardian Luxguard II S.A. (gekuckt den 1. Juli 2015)
  4. industrie.lu: Automotive Glass Plant (gekuckt den 1. Juli 2015)
  5. Lëtzebuerger Journal: Luxguard übergibt an Central Glass (24. Sepemtber 2014)
  6. guardian.com: Guardian Europe moves to new HQ in Bertrange, Luxembourg (gekcukt den 1. Juli 2015)
  7. guardian.lu: As much as we'd like to know about you, there's probably a lot you want to know about us. (gekuckt den 1. Juli 2015)