Smartphone

Vu Wikipedia
Op d'Navigatioun wiesselen Op d'Siche wiesselen
Dräi Smartphones mat engem Android-Betribssystem

E Smartphone ass e mobillen Apparat, deen d'Funktioune vun engem Handy a vun engem Computer verbënnt. En ënnerscheet sech vun engem "klasseschen" Handy duerch seng méi staark Hardware-Ausstattung an ëmfangräich mobil Betribssystemer, déi nieft de Kärfunktioune vum Telefon (Sproochappellen an Textnoriichten) och méi breet Software-, Internet a Multimediafunktiounen (Musek, Video, Kamera, Spiller) erméiglechen.

De Smartphone gëtt iwwer en Touchscreen navigéiert. E kann entweder iwwer d'mobil Breetbandverbindung vum GSM-Operateur oder iwwer WLAN mam Internet verbonne ginn.

Zënter ongeféier 2010 ass Android dat meeschtverbreete Smartphone-Betribssystem a gëtt vu bal alle Produzente benotzt. Deen eenzeg anere wäitverbreete Betribssystem ass iOS, deen nëmmen op Apparater vun Apple funktionéiert.

Déi éischt Handye mat Smartphone-Funktiounen gouf et an de spéiden 1990er Jahren. De Begrëff "Smartphone" ass 1999 vun der schwedescher Entreprise Ericsson fir d'éischt benotzt ginn. Wéi Apple 2007 den iPhone erausbruecht huet, huet dat den Handysmaart revolutionéiert an de Smartphone sech ëmmer méi séier verbreet. Haut sinn déi meescht Handyen, déi verkaaft ginn, e Smartphone. Duerch de permanent méiglechen Internetzougank duerch e Smartphone huet dat och e Wandel am Internetgebrauch mat sech bruecht, besonnesch bei sozialen Netzwierker wéi Facebook. Et huet och nei Kommunikatiounsformen erméiglecht iwwer Déngschter wéi WhatsApp oder Instagram. Déi Méiglechkeet vun enger permanenter Notzung kann awer och zu enger Smartphonesucht féieren an d'Sozialbehuele vun der Benotzer veränneren.

Biller[änneren | Quelltext änneren]

Commons: Smartphone – Biller, Videoen oder Audiodateien