Transborderbréck

Prinzip vum Fonctionnement

Eng Transborderbréck ass eng Bréck déi aus zwéin Deeler besteet, an zwar d'Bréck am Fachwierkbau mat engem Tablier, mat drënner enger Gondel de sougenannten Transborder deen a Seeler hänkt. Den Tablier an d'Drodunn déi als Hänkbréck als Schréiseelbréck oder a Cantileverbauweis ausgefouert kënne sinn, hunn an de meeschte Fäll nëmmen als Missioun d'Schinnen ze droen op deenen d'Rolle lafe mat deenen den Transborder hin an hier beweegt gëtt.

Sou Transborderbrécke goufen op Plazen opgeriicht, wou wéinst dem Schëffsverkéier d'Bréck eng fräi Héicht huet missen hunn déi der Héicht vun de Maste vun de Seegelschëffer entsprach huet. D'Iddi vun den Tranborderbrécke koum vun de Seelbunnen hier, a waren eng Kombination vun enger Standbunn op enger Breck mat ënnendrënner enger grousser Plattform fir den Transport vu Persounen a Ween oder Kutschen.

Bis op eng Ausnam stoungen déi Brécke fräi an der Landschaft, a just d'Bréck vu Rendsburg war un d'Verkéiersnetz ugebonnen an huet dozou nach den Déngscht als Eisebunnsbréck gemaach.

Déi éischt gouf 1893 a Spuenien opgeriicht an am Ganze goufen op der Welt 20 där Brécke gebaut, eng gouf ni fäerdeggebaut, an eng aner gouf zweemol op verschiddene Plazen opgeriicht.

D'Erfinder vun der Bréck

Wien den eigentlechen Erfinder ass, ass hautdesdaags net méi mat Sécherheet festzestellen, dat och well d'Transborderbéck eng Applikatioun vun der Seelbunn ass. Wann och de Spuenier Alberto de Palacio 1893 déi éischt Transborderbréck bei Bilbao opgeriicht huet sou schéngt et awer wéi wann et e gemeinsame Projet vum him an dem Fransous Ferdinand Arnodin war. Fest steet op jiddwer Fall datt de Palacio de 5. November 1887 bei der Regierung zu Bilbao eng Demande fir d'Patent vun enger Transborderbréck ofginn huet, an datt den Arnodin de selwechten Dag ëm déi selwecht Zäit sou e Patent zu Paräis ugemellt huet.

Ausserdeem si Pläng bekannt déi den Amerikaner J.W. Morse 1869 gemaach hat fir iwwer den East River en Transborder ze bauen, souwéi vum Charles Smith vun 1872 fir en Transborder zu Middlesbrough iwwer de Floss Tees opzeriichten. Déi Konstruktioun gouf eréischt 1911 realiséiert.

D'Pläng vum Arnodin a vum Palacio déi souguer an de klengsten Detailer komplett identesch sinn, loossen drop schléissen, datt déi Zwéi sech ofgeschwat haten éier se hir Patenter ugemellt hunn. Am Abrëll 1888 huet de Arnodin dem Conseil général de la Charente-Inférieur seng Pläng fir en Transborder virgeluecht an de selwechte Mount huet de Palacio seng fir d'Bréck vu Portugalete bei Bilbao ofginn. Den Arnodin krut keen Accord awer de Palacio krut den 12. Februar 1890 gréng Luucht fir säin Transborder opzeriichten, wat den éischte vun där Zort war, deen op der Welt gebaut gouf.

Joer	Numm	Plaz	Ausser Déngscht	Ofgerappt	Bemierkungen
1893	Puente de Vizcaya	Portugalete - Las Arenas			An Déngscht
1898	Transborderbréck vu Bizerte	Bizerte	1903	1903	Zu Brest erëm opgeriicht
1899	Transborderbréck vu Rouen	Rouen	Juni 1940	Enn 1940
1900	Transborderbréck vum Martrou	Le Martrou - Rochefort			Am Déngscht fir Touristen
1903	Transborderbréck vun Nantes	Nantes	Dezember 1954	Mee 1958
1905	Transborderbréck vu Marseille	Marseille	Mäerz 1944	August 1944
1908	Transborderbréck vu Brest	Brest	1944	1947
	Transborderbréck vu Bordeaux	Bordeaux		1942	Just Piliere ware gebaut ginn
	Transborderbréck vu Lucy	Monceau-les-Mines			Gouf duerch eng Hiefklappbréck iwwer dem Canal du Centre ersat.
1905	Transborderbréck Runcon-Widnes	Runcorn - Widnes	Juli 1961	Enn 1961
1906	Transborderbréck vun Newport	Pillgwenlly - Somerton			An Déngscht
1911	Transborderbréck vu Middlesbrough	Middlesbrough - Port Clarence			An Déngscht (Video iwwer d'Bréck)
1916	Transborderbréck vu Warrington	Warrington	1964		Nach heiansdo a Betrib
1905	Transborderbréck vun Duluth	Duluth	1927		Gouf 1929 als Hiefbréck ëmgebaut
1933	Sky Ride	Chicago		1934	War just fir d'Ausstellung Century of Progress gebaut ginn.
1914	Ponte Pênsil Alexandrino de Alencar	Rio de Janeiro	1935		Gouf mat enger Stroossebréck ersat