Wunne mat der Wooltz

Vu Wikipedia
Op d'Navigatioun wiesselen Op d'Siche wiesselen

Wunne mat der Wooltz ass en urbanistesche Projet an der Gemeng Wolz, bei deem eng 26 Hektar grouss Industriebroochen op den zwou Säite vum Floss Wolz ("Wooltz" am lokalen Dialekt), tëscht- Uewer- an Nidderwolz, opgewäert a reamenagéiert solle ginn.

De Fonds du Logement plangt do, en neie Wunnquartier ze bauen, an deem a ronn 1.000 Wunnengen an Haiser bis zu 2.200 Leit ënnerdaach komme kéinten.[1]

Geschicht[änneren | Quelltext änneren]

De Projet betrëfft en Areal, op deem tëscht 1912 an 1961 d'Giewerei Ideal Lieder a Liedersartikele produzéiert huet. Dono huet d'Firma Eurofloor (spéider zu Tarkett/Sommer fusionéiert) den Terrain fir e symbolesche Frang iwwerholl, an do eng 30 Joer laang Buedembeleeg produzéiert. 1996/97 ass se erausgeplënnert an huet dem Staat den Terrain 2011 fir ee symboleschen Euro verkaaft. Nodeems de Terrain sanéiert gi war, goufen déi meescht Gebaier, déi drop stinn, ofgerappt. Vun der aler Giewerei bleiwe just en zille Schaarstech, e Verwaltungsgebai sou wéi eng Paart (mat enger Erënnerungsplack un de Streik vum 30. August 1942) erhalen.

De Projet[änneren | Quelltext änneren]

Beim Projet (deen och den Site Haargarten niewendru mat abezitt) soll d'Kreeslafekonomie eng wichteg Roll spillen, wat d'nohaltegt Bauen an d'Gestioun betrëfft. D'Baachbett soll renaturéiert ginn, den Auto méiglechst aus dem Quartier erausgehale ginn, an e soll un d'Gare Wolz ugebonne ginn, déi zu engem Multimodal-ëmklammpunkt erweidert soll ginn. Virgesi si virun allem Appartementsgebaier mat 3 bis 4 Stäck. Geplangt sinn och eng Grondschoul fir 320 Kanner, eng Maison relais, e pedagogesche Musée, eng Musekschoul, e Supermarché, Sportsinfrastrukturen, Säll fir sech ze begéinen a Gemenischafts-Geméisgäert.

D'Schoul an déi éischt Wunnege sollen 2022 prett sinn (Stand Aug. 2019).

Architekte vum Masterplan sinn Heisbourg Strotz (hsa), Schroeder & Associés a Maja Devetak.

Literatur[änneren | Quelltext änneren]

Referenzen[Quelltext änneren]

  1. Quell vum Artikel, wou net anescht uginn, Hansen (2019) an der Literatur.

Um Spaweck[änneren | Quelltext änneren]