Camille Wagner-Rollinger

Vu Wikipedia
Dësen Artikel beschäftegt sech mat dem Ekonomist an Zoolog Camille Wagner. Fir aner Leit mat dem selwechten Numm, kuckt wgl. Camille Wagner.
Camille Wagner-Rollinger
Gebuer 12. Juni 1900
Bréissel
Gestuerwen 1986
Nationalitéit Lëtzebuerg
Aktivitéit Ekonomist, Lepidopterolog
Member vun Section des sciences morales et politiques vum Institut grand-ducal, Section des sciences naturelles, physiques et mathématiques vum Institut grand-ducal, Section de linguistique, d'ethnologie et d'onomastique vum Institut grand-ducal

De Camille Wagner oder Camille Wagner-Rollinger, gebuer den 12. Juni 1900 zu Bréissel[1], gestuerwen am Joer 1986[2], war e lëtzebuergeschen Ekonomist a Lepidopterist.

Studien a Beruff[änneren | Quelltext änneren]

No der Première am Atheneum huet de Camille Wagner vun 1919 bis 1923 Ekonomie zu Léck studéiert, wou hie seng « Licences en sciences commerciales, consulaires et financières» gemaach huet. 1930 huet hie säin Doktorat a seng Agregatioun an der politescher Ekonomie an an de moderne Sprooche gemaach, och zu Léck.[1] D'Thes, mam Sujet « La sidérurgie luxembourgeoise sous les régimes du Zollverein et de l'Union économique belgo-luxembourgeoise », ass 1931 zu Lëtzebuerg als Buch vun 207 Säiten, gedréckt vun der Imprimerie Artistique Luxembourgeoise, erauskomm. Vun 1931 bis 1946 huet Camille Wagner zu Léck als Professer a der « École des Hautes Études commerciales et consulaires » an an der « École normale pour instituteurs » enseignéiert. 1947 ass hien zeréck op Lëtzebuerg komm, wou hie verschidde Lécker Stolfirmae vertrueden huet.[1]

De Camille Wagner huet vun elo un an der Stad Lëtzebuerg gewunnt. Nodeems hie wärend zwanzeg Joer Generalsekretär vun der « Fédération des relamineurs du fer et de l'acier de la CECA » (FEDEREL-CECA) a permanenten internationalen Delegéierte bei der CECA zu Lëtzebuerg an duerno bei der Europäescher Kommissioun zu Bréissel war, ass hien 1973 mam Titel « Directeur honoraire de la FEDEREL-CECA » an d'Pensioun gaangen.[1]

De Päiperleksfuerscher[änneren | Quelltext änneren]

De Camille Wagner war e begeeschterte Lepidopterist, dee schonn 1918 als jonke Mënsch an der däitscher « Entomologische Zeitschrift », déi zu Frankfurt am Main erauskoum, seng éischt Artikele publizéiert huet: « Einiges über Hemaris scabiosae »[3] an duerno « Erlebnisse mit Limenitis populi und Apatura iris »[4].[5]

Seng spéider lepidopterologesch Publikatiounen am Bulletin vun der Société des naturalistes luxembourgeois (SNL), an den « Archives » vum Institut grand-ducal, an der belscher Zäitschrëft Linneana Belgica asw. huet de Camille Wagner, dee mat der Charlotte Rollinger bestuet war[6], mat Wagner-Rollinger signéiert. Säin Haaptwierk ass sécherlech d'Artikelserie « Les Lépidoptères du Grand-Duché de Luxembourg (et des régions limitrophes)», déi vun 1950 u bis 1979 an den «Archives » vum Institut grand-ducal publizéiert gouf; an de Joren duerno koumen nach e puer Supplementen no.

De Camille Wagner war Member vun der SNL. Hie war och Member vun der Section des sciences vum Institut grand-ducal (vun 1957 un[7]), a vun der Section des sciences morales et politiques an der Section de linguistique.[1]

Literatur[änneren | Quelltext änneren]

  • Anonyme, 1983. Heureux anniversaire ! Docteur Camille Wagner-Rollinger. Lujana 1 (2), S. 32-36 (Luxembourg).
  • Saussus, R., 1980. Heureux anniversaire: le Dr Camille Wagner-Rollinger a 80 ans. Linneana Belgica 8 (3), S. 123-125.

Referenzen[Quelltext änneren]

  1. 1,0 1,1 1,2 1,3 1,4 Saussus 1980.
  2. Massard, J.A., 1989. La vie scientifique. In: M. Gerges (éd.): Mémorial 1989: la Société luxembourgeoise de 1839 à 1989. Les Publications Mosellanes, Luxembourg, S. 422.
  3. Entomologische Zeitschrift Jg. 32 (1918/19), Nr. 12 (14. September 1918), S. 45. [1]
  4. Entomologische Zeitschrift Jg. 32 (1918/19), Nr. 14 (12. Oktober 1918), S. 54-55. [2]
  5. Massard, J.A., 2015. La Société des naturalistes luxembourgeois de 1890 à 2015. Bulletin de la Société des naturalistes luxembourgeois 116, S. 149.
  6. Cf. Luxemburger Wort 1928, Nr. 366 (31. Dezember), S. 4 (avis mortuaire: Mme Joseph Rollinger). [3]
  7. Archives de l'Institut grand-ducal de Luxembourg, Section des sciences naturelles, physiques et mathématiques NF 24 (1957), S. 6 (séance du 31 janvier 1957)