Wäschbier

Vu Wikipedia
Wiesselen op: Navigatioun, sichen
Wäschbier
E Wäschbier.
E Wäschbier.
Systematik
Räich: Déiereräich
Stamm: Chordata
Klass: Mamendéieren
Ënnerklass Héijer Mamendéieren
Uerdnung: Raubdéieren
Iwwerfamill: Hondsdéieren
Famill: Klengbieren (Procyonidae)
Gattung: Wäschbieren (Procyon)
Aart: Wäschbier
Wëssenschaftlechen Numm
Procyon lotor
Linnaeus

De Wäschbier (Procyon lotor) ass e Raubdéier aus der Famill vun de Klengbieren (Procyonidae, de: Kleinbären) aus Nordamerika. Zanter der Mëtt vum 20. Joerhonnert lieft en als Neozoon um europäische Festland, am Kaukasus an a Japan, wou en ausgesat gouf oder aus der Gefaangeschaft fortgelaf war.

Beschreiwung[änneren | Quelltext änneren]

Wäschbieren erkennt ee liicht un hirer charakteristescher schwaarz-wäisser Gesiichts"mask" an hirem horegen, gesträiften, 20 bis 40 cm laange Schwanz. Se hunn e breede Kapp mat enger spatzer Schnëss, kuerz, ofgeronnt Oueren, e gedrongene Kierperbau a laang Been. Hire Pelz ass groelzeg-brong bis donkelgro. D'Zéiwe vun de viischte Patten sinn zimlech laang a kënnen ausernee gespreet ginn. D'Neel kënnen net eragezu ginn.

Wäschbiere sinn, vum Kapp bis zum Hënner, ronn 50 bis 90 cm laang a weien 3 bis 15 kg.

Se liewen eleng oder a klenge Famillen. Se sinn net territorial, och wann et seelen ass datt d'Wunngebidder vu Männchen sech iwwerschneiden. D'Wäschbiere si virun allem nuets aktiv. Am Dag schlofen se gewéinlech an Hielen, Lächer a Beem, oder verloossene Villerchersnäschter. Se hale kee Wanterschlof, bleiwen awer an hirer Stopp wann et ze kal oder ze naass ass.

Wäschbieren trëppele lues, mam Kapp no beim Buedem, kënnen awer séier lafen wann et muss sinn. Se kënnen och gutt schwammen a kloteren. Hire Gerochs- an Taaschtsënn ass gutt entwéckelt, an hëlleft hinnen Friessen ze fannen.

Se si gewéinlech schei, mä kënne méi keck gi wann se an der Géigend vu Mënsche wunnen an u si gewinnt sinn.

Se sinn Allesfrësser, a friesse klengt Gedéiesch (Schleeken, Wierm, Amphibien, Mais, Insektelarven, Fësch, Eeër a kleng Vijel), mä och Friichten, Nëss, Bieren, Kären oder, an der Emgéigend vu Mënschen, Iessensreschter déi s'an Dreckskiwwele fannen.

Wäschbiere verkoppele sech am Januar-Februar, déi meeschtens 4-5 Jonk kommen no 60-73 Deeg op d'Welt. Se ginn no annerhallef bis 4 Méint gespéint. Duerno bleiwen se gewéinlech bis den Hierscht bei der Mamm, deemno wéi och de Wanter iwwer, a sinn dann uganks vum nächste Joer erwuessen a prett, sech ze reproduzéieren. Wäschbiere kënne bis zu 16 Joer al ginn, dacks awer just eng siwen, a wa se gefaange sinn, och alt emol bis 20 Joer.

An Amerika liewen d'Wäschbieren tëscht Kanada a Panama, am léifsten a Lafbëscher, mä se kënne sech un aner Habitater upassen. An Europa goufen se op verschiddene Plazen agefouert, fir, wéinst hirem Pelz, se ze joen oder ze ziichten. Als Neozoe verbreeden se sech vun deene Plazen, wou se ausgesat goufen (oder ausgebéckst sinn).