Aquakultur

Aquakultur (Frellen) an enger Fëschfarm am Kosovo

Aquakultur ass d'Zuucht vun Organismen, déi am Waasser liewen, besonnesch Fësch, Muschelen, Kriibsen an Algen. Dofir gëtt ënner kontrolléierte Konditiounen eng Populatioun vun engem bestëmmten Organismus opgebaut. Domat ënnerscheet sech d'Aquakultur vun der Fëscherei, déi d'Recoltéiere vu wëlle Waasserdéieren ass. Enger vaster Approche no kann een d'Fëscherei der Juegd zouuerdnen an d'Aquakultur der Agrikultur.^[1]

Den Term "Kultur" implizéiert eng Form vun Interventioun am Zuuchtprozess fir d'Produktioun ze verbesseren, zum Beispill d'Fidderen oder d'Schütze viru Predateuren. En implizéiert och en individuellen oder juristesche Besëtzer vum Stock. Aquatesch Organismen, déi vun där Persoun oder Organisatioun rekoltéiert ginn, där deen Organismus wärend der ganzer Zuuchtperiod gehéiert huet, zielen zu de Produkter vun der Aquakultur. Am Géigesaz dozou gëtt et déi aquatesch Organismen, déi ëffentlech exploitéiert kënne ginn, well s'eng Ressource mam Statut "propriété commune" sinn; si zielen zu de Produkter vun der Fëscherei.^[2]

2008 huet d'Aquakultur 46 % vum weltwäite Mieresfriichtekonsum geliwwert, an et gëtt geschat, datt dësen Taux nach weider klamme wäert.^[3] Déi gréisste Aquakulturproduzenten op der Welt sinn (2012):^[4]

01: China: 41,1 Milliounen Tonnen, 66 Milliarden USD
02: Indien: 4,2 Milliounen Tonnen, 9 Milliarden USD
03: Vietnam: 3 Milliounen Tonnen, 5,8 Milliarden USD
04: Indonesien: 3 Milliounen Tonnen, 6,7 Milliarden USD
05: Bangladesch: 1,7 Milliounen Tonnen, 3,9 Milliarden USD
06: Norwegen: 1,3 Milliounen Tonnen, 5,1 Milliarden USD
07: Chile: 1 Millioun Tonnen, 6 Milliarden USD
08: Egypten: 1 Millioun Tonnen, 2 Milliarden USD
09: Myanmar: 8,9 Millioun Tonnen, 1,5 Milliarden USD
10: Philippinnen: 7,9 Millioun Tonnen, 2 Milliarden USD