Ferizaj

Vu Wikipedia
Op d'Navigatioun wiesselen Op d'Siche wiesselen
Ferizaj
Deshmorete-Kombit.jpg
Land Flag of Kosovo.svg Kosovo
Verwaltungseenheet: Distrikt Ferizaj
Koordinaten: 42° 22’ 12’’ N
21° 09’ 18’’ O
Fläch: 345  km²
Awunner: 111.841 (Gemeng, 2013)[1]
Héicht: 573 m i. NN
Websäit: www.kk.rks-gov.net/ferizaj
D'Gemeng Ferizaj am Kosovo:
Ferizaj 2006.PNG

Ferizaj (op albanesch och nach: Ferizaji, op serbesch: Uroševac oder Урошевац) ass eng Stad a Gemeng am Süde vum Kosovo an no Pristina a Prizren déi drëttgréisst Stad am Land. D'Gemeng setzt sech aus der Haaptuertschaft mam selwechten Numm a 45 Dierfer zesummen an huet iwwer 110.000 Awunner.

Geschicht[änneren | Quelltext änneren]

Ferizaj ass eng vun de jéngste Stied am Kosovo. Si ass nom Bau vun der Eisebunnslinn Mitrovica-Skopje am Joer 1873 entstanen. Den Hotelbesëtzer Feriz Shasivari (no dem d'Stad benannt ass) hat eng Gare op sengem Land baue gelooss, rondrëm déi eng Uertschaft entstanen ass, déi séier gewuess ass, an deemools nach zum Osmanesche Räich gehéiert huet.

1913 ass d'Stad bei d'Kinnekräich Serbien komm a gouf an Uroševac (d'Stad vum Uroš), nom serbesche Kinnek Stefan Uroš V., ëmbenannt. Am éischte Weltkrich war d'Stad vun Éisträich-Ungarn, am zweete Weltkrich vum Kinnekräich Italien besat.

Wirtschaft[änneren | Quelltext änneren]

Ronn 4000 Entreprisen sinn zu Ferizaj registréiert, dorënner eng Zillefabréck, eng Uelegfabréck an Entreprisen déi Uebst an Holz verschaffen. An den Dierfer gi Weess, Mais, Sonneblummen, Soja a Gromperen ugebaut.[2]

Camp Bondsteel[änneren | Quelltext änneren]

Am Oste vun der Stad läit de Camp Bondsteel, eng amerikanesch Militärbasis an där den Haaptquartéier vum amerikanesche KFOR-Kontigent ass. Si ass nom Vietnamkrichveteran James Leroy Bondsteel benannt an ass mat 386 Hektar ongeféier hallef sou grouss wéi déi ganz Stad. De Camp gouf 1999 nom Amarsch vun der NATO am Kosovo gebaut.

Ronn 250 Holzbaracken déngen als Büro an Ënnerkonft, mä et fënnt een um Site och vill Ariichtungen vum soziale Liewen (e Kino, e Supermarché, e Fitnessstudio, Restauranten, e Bildungszentrum an deem ee Course vun amerikaneschen Unië beleeë kann, etc).

De Camp Bondsteel mat senge 5000 Zaldoten ass e wichtege Wirtschaftsfacteur fir Ferizaj.

Kultur[änneren | Quelltext änneren]

Am Zentrum vu Ferizaj leien nëmmen e puer Meter vuneneen ewech déi grouss Moschee vum Mulla Veseli an d'orthodox Kierch vum hellegen Uroš aus dem Joer 1933. D'Proximitéit vun den zwee Gebaier gëllt als Symbol fir déi joerzéngtelaang reliéis Toleranz tëscht Muslimen a Chrëschten. D'Moschee aus dem Joer 1891 gouf am zweete Weltkrich zerstéiert an duerno nees opgebaut. Am Kosovokrich vun 1999 gouf keent vun de Gebaier zerstéiert. Während Onrouen am Mäerz 2004 gouf d'Kierch vun Extremisten attackéiert mä net zerstéiert.

Et gëtt en Theater an der Stad selwer.

Sport[änneren | Quelltext änneren]

De Foussballclub KF Ferizaj spillt an der héchster nationaler Divisioun, der Raiffeisen Superliga.

Galerie[änneren | Quelltext änneren]

Referenzen[Quelltext änneren]

  1. Schätzung vun der kosovarescher Agence fir Statistik fir den 31. Dezember 2013 (Quell: ask.rks-gov.net "ESTIMATED DATA FOR 2013 BY MUNICIPALITY.xls")
  2. https://kk.rks-gov.net/ferizaj/Temat/Economy.aspx