Parlament

Vu Wikipedia
Wiesselen op: Navigatioun, sichen

E Parlament (v. alfr.: parlement - Gespréich; v. fr.: parler - schwätzen) ass d'Versammlung vu Vertrieder vun enger administrativer Gebittseenheet (z. B. Europäesch Unioun, Staat, Bundesrepublik, Bundesland, Kanton), déi Gesetzer mécht (Legislativ). Keng Parlamenter am staatsrechtleche Sënn sinn absënns déi däitsch Gemengevertriedungen.

Zur Zäit vum Ancien Régime a Frankräich war e Parlament allerdéngs e Geriichtshaff, an hat wéineg mam haitege Sënn vu "Parlament" ze dinn.

An enger Demokratie ginn d'Representante vun engem Parlament duerch Wale bestëmmt. An anere Regierungsforme gëtt et och Ernennungen.

An demokratesche Staaten huet d'Parlament nieft dem Recht Gesetzer an de Budget ze maachen och nach d'Missioun, d'Regierung ze kontrolléieren. Deputéiert hu vis-à-vis vun der Regierung an den eenzelne Ministeren d'Recht op Renseignementer an ënner Ëmstänn op e Mësstrauensantrag. D'Regelungen heifir sinn an der Konstitutioun vum jeeweilege Staat an an der parlamentarescher Geschäftsuerdnung festgeluecht.

Déi meescht Parlamenter bestinn aus zwéin Haiser (Zweekummersystem); d'Membere vun där méi klenger Kummer ginn dacks net direkt gewielt, mä vun Ënnergebittseenheeten (z. B. Bundeslänner) geschéckt. Wichteg Organer si Parlamentspräsident a Stellvertrieder, Fraktiouns-President vun de Parlamentsparteien an déi fachbezunnen Ausschëss, an deenen d'Gesetzespropositioune virbereet ginn.

Et ënnerscheet een tëscht Aarbechts- a Riedeparlamenter: An engem Riedeparlament (z. B. Britescht Ënnerhaus) ginn all politesch Froen an Diskussiounen diskutéiert, während an engem Aarbechtsparlament (z. B. amerikanesche Kongress) e groussen Deel vun der Aarbecht an Ausschëss gemaach gëtt.

Als Parlament am méi breede Sënn ginn och Delegéierteversammlunge vun internationalen Organisatioune bezeechent, z. B. d'Parlamentaresch Versammlung vun der OSZE.

Kuckt och[änneren | Quelltext änneren]

Um Spaweck[änneren | Quelltext änneren]

Commons: Parlamenter – Biller, Videoen oder Audiodateien